पोखरा । पोखराको पृथ्वीनारायण क्याम्पसमा स्वतन्त्र विद्यार्थी युनियन (स्ववियु) को निर्वाचन शान्तिपूर्णरुपमा सम्पन्न भएको छ । आज सम्पन्न निर्वाचनमा दुई हजार आठ सय ९७ मत खसेको बताइएको छ ।
क्याम्पसमा नौ हजार दुई सय ७० मतदाता भए पनि न्यून संख्यामा मत खसेको हो । बिहान ८ बजे शुरु भएको मतदान ४ बजे सम्पन्न भएको निर्वाचन अधिकृत प्राडा रामचन्द्र पोखरेलले जानकारी दिए । निर्वाचन यसअघि विविध कारणवश निर्वाचन स्थगित भएकाे थियाे । राष्ट्रियस्तरमै चर्चामा रहेको पृथ्वीनारायण क्याम्पसमा २०६५ सालपछि आज बल्ल निर्वाचन भएकाे हाे ।
देशैभर एकैपल्ट गत ५ चैतको निर्धारित चुनावमा मतदान सुरु हुनैलाग्दा मतपत्रमा त्रुटि भेटिएपछि उत्पन्न विवादले चुनाव रोकिन पुगेको थियो । मतपत्रमा अखिल (छैटौं) का अध्यक्ष पदका उम्मेदवार मिलन सुनारको नामको पछाडि रेजा लगाउने बक्स छुटेपछि विवाद सिर्जना भएको हो । त्यसक्रममा विद्यार्थीले नाराबाजी गरेका थिए ।
निर्वाचन अधिकृत प्राडा पोखरेलले भोलिपल्ट ६ चैतका लागि मतदानको कार्यतालिकासहित सूचना जारी गरे पनि ५ गते साँझ निर्वाचन कार्यालयमा संयुक्त प्यानलसहित अखिल छैटौं र नयाँ शक्ति विद्यार्थी युनियनले तालाबन्दी गरेपछि अर्को सूचना जारी गर्दै अनिश्चितकालसम्म चुनाव स्थगन गरेका थिए ।
मतपत्रमा त्रुटिको विषयमा निर्वाचन समितिले आत्मालोचनासमेत गरेको थियो । क्याम्पसमा एकछत्र चुनाव जित्दै आएको अनेरास्ववियुले चुनाव भाँड्न अनेक प्रपञ्च रचिएको भन्दै तत्काल निर्वाचन माग गर्दै सांकेतिक विरोधसमेत गरेकाे थियाे ।
चैत ६ गते निर्वाचन समिति, क्याम्पस प्रशासन र निर्वाचनमा भाग लिएका विभिन्न संघ, संगठन, प्यानल र स्वतन्त्र उम्मेदवारसमेतको सर्वपक्षीय बैठक बसेर आजका लागि नयाँ मिति तोकेको थियो ।
पृथ्वीनारायण क्याम्पसमा २२औं स्ववियु अध्यक्षका लागि दुई स्वतन्त्रसहित आठ जना अध्यक्ष पदका लागि प्रतिस्पर्धामा छन् । २१ सदस्यीय समितिका लागि १० जना समानुपातिकबाट निर्वाचित हुनेछन् । समानुपातिक सदस्य निर्वाचित भएकामध्ये एक जना उपाध्यक्ष र एक जना सहायक सचिव हुने व्यवस्था छ । निर्वाचनका लागि प्रत्यक्षतर्फ आठ र समानुपातिकतर्फ नौ वटा संघ, संगठन, प्यानल दर्ता भएका छन् ।
एमाले निकट अनेरास्ववियुबाट विष्णु पोखरेल र काँग्रेस निकट नेविसंघका सुशील न्यौपाने नेतृत्वको प्यानलबीच कडा प्रतिस्पर्धा हुने आकलन गरिएको भए पनि स्वतन्त्र उम्मेद्वार कमल सुवेदीले कडा टक्कर दिएकाे बताइएको छ ।
स्ववियु अध्यक्ष पदका लागि मा अखिल (क्रान्तिकारी) बाट नवीन अधिकारी, अखिल (छैटौं) बाट मीलन सुनार, प्राज्ञिक विद्यार्थी परिषद् नेपालबाट दिप्सन गुरुङ र स्वतन्त्र विप्लवी न्यौपाने पनि स्वतन्त्र उम्मेदवार छन् ।
पृथ्वीनारायण क्याम्पसलाई राजनीतिक नेता जन्माउने थलोका रुपमा पनि लिने गरिन्छ । यही क्याम्पसमा स्ववियु अध्यक्ष बनेका पूर्वमन्त्री रवीन्द्र अधिकारी, पोखरा महानगरपालिकाका वर्तमान मेयर धनराज अधिकारी पनि हुन् ।
