पोखरा । पोखरा महानगरपालिका वडा नं. ८ स्थित उर्जाशील आमा समूहले आयोजना गरेको बाटेको धूप बनाउने तालिम सम्पन्न भएको छ ।
वडा कार्यालय पोखरा-८ को सहयोगमा दुई दिन आयोजित तालिममा समूहमा आवद्ध ४३ जना सहभागी थिए । सहभागीलाई सावित्री घिमिरेले प्रशिक्षण दिएकी थिइन् ।
कार्यक्रम उद्घाटन गर्दै वडाध्यक्ष रुद्रनाथ बरालले तालिमले महिलालाई आत्मनिर्भर बनाउन सघाउने बताए । उनले वडाले यस्ता प्रकारका सिपमूलक तालिमका लागि सहयोग गर्न वडा कार्यालय तयार रहेको बताए ।
वडासदस्य पवित्रा केसीले महिला दिदीबहिनीलाई आत्मनिर्भर बनाउन तालिम अत्यन्तै महत्वपूर्ण हुने बताइन् । उनले तालिममा सिकेका सिप व्यवहारमा लागू गर्न सकिएमात्रै तालिमले सार्थकता पाउने स्पष्ट पारिन् ।
समूहकी अध्यक्ष कान्ती अधिकारीले समूहमा आवद्द सदस्यका लागि आयोजित बाटेको धूप बनाउने तालिम निकै फलदायी भएको बताइन् । आवश्यकता अनुसार नै आफू र संस्थाले तालिमका लागि पहल गरेको उनको भनाइ थियो ।
तलिमका प्रशिक्षार्थीद्वय ममता अधिकारी र लक्ष्मी सिलवालले बाटेको धूप बनाउने तालिम आफूहरुका लागि निकै महत्वपूर्ण भएको र यसले आयआर्जनमा निकै सघाउने बताए ।
कार्यक्रममा जाल्पादेवी महिला उद्दार समूहकी अध्यक्ष दुर्गा अधिकारी, सिर्जना टोल विकास संस्थाका कोषाध्यक्ष मनोहरि बराल, समूहकी संस्थापक अध्यक्ष विष्णुदेवी पन्त, निवर्तमान अध्यक्ष कल्पना कंडेललगायतले बोलेका थिए ।
तालिम उद्घाटन सत्रमा स्वागत उपाध्यक्ष जानकी अर्याल र सञ्चालन सचिव दीपा रेग्मीले गरेका थिए ।
समापन सत्रमा स्वागत कोषाध्यक्ष रिलमाया गुरुङ र सञ्चालन उपाध्यक्ष जानकी अर्यालले गरेका थिए ।
समूहकी अध्यक्ष कान्ती अधिकारीको अध्यक्षतामा दुवै सत्रको कार्यक्रम सम्पन्न भएको थियो ।
