काठमाडौं । इन्डियन प्रिमियर लिग (आईपीएल) दिल्ली क्यापिटल्सले रोमाञ्चक जित हासिल गरेको छ ।
सोमबार भएको खेलमा दिल्लीले लखनउ सुपर जायन्ट्सलाई एक विकेटले हराएको हो ।
लखनउले दिएको दुई १० रनको लक्ष्य दिल्लीले तीन बल बाँकी छँदा नौ विकेट गुमाएर भेट्टाएको हो ।
अन्तिम तीन ओभरमा ३९ रन आवश्यक रहँदा विकेट गुम्न थालेपछि आशुतोषले जिम्मेवारी लिँदै खेल जिताए ।
सुरुवातमै तीन विकेट गुमाएपछि दबाबमा आएको दिल्लीका लागि अक्षर पटेल, फाफ डु प्लेसी र ट्रिस्टन स्टब्सले केहीबेर सम्हालेका थिए ।
आशुतोष ६६ रनमा अविजित रहे भने विप्राज निगमले ३९ रन बनाए । आशुतोष र विप्राजले सातौं विकेटका लागि ५५ रनको साझेदारी गरेका थिए ।
त्यसअघि स्टब्सले ३४, डुप्लेसीले २९ तथा अक्षरले २२ रन बनाए । लखनउका लागि शार्दुल ठाकुर, मनिमरन सिद्धार्थ, दिग्वेश राथी र रवि विश्नोइले दुई-दुई विकेट लिए ।
त्यसअघि टस हारेर पहिले ब्याटिङको निम्तो पाएको लखनउले २० ओभरमा आठ विकेट गुमाएर दुई सय नौ रन बनाएको थियो । निकोलस पूरनले सर्वाधिक ७५ तथा मिचेल मार्शले ७२ रन बनाए ।
दिल्लीका लागि मिचेल स्टार्कले तीन विकेट लिए भने कूलदीप यादवले दुई तथा मुकेश कुमार र विप्राज निगमले एक-एक विकेट लिए ।
