पोखरा । नेपाली कांग्रेस माझठानाका पूर्व गाविस सभापति तथा समाजसेवी टीकाराम लामिछानेको ७८ बर्षको उमेरमा निधन भएको छ । पोखरास्थित मणिपाल शिक्षण हस्पिटलमा उपचार गराइरहेका लामिछानेको उपचारकै क्रममा शनिबार साँझ निधन भएको हो ।
२००३ साल भदौ ५ गते साविक माँझठाना गाविस वडा नं ९ हाल पोखरा महानगरपालिका वडा नं २८ लामिछाने गाँउमा जन्मिएका लामिछाने विगत केही वर्षदेखि फोक्सो तथा पिसावसम्वन्धी समस्याबाट पीडित थिए । लामिछानेले विभिन्न समाजिक, राजनीतिक, धार्मिक क्षेत्रसहित विकास निर्माण सक्रिय रहँदै आएका थिए ।
२०४२ मा तत्कालिन माँझठाना गाउँ पञ्चायतको उपप्रधानपञ्च बनेर काम गरेका लामिछाने नेपाल रेडक्रस सोसाइटी माँझठाना शाखाको सभापति, माँझठाना स्वाथ्य चौकीको अध्यक्ष, रत्नशोभा मावि विद्यालय व्यवस्थापन समिति अध्यक्ष, माँझठाना गाविस नेपाली कांग्रेसको सभापति, थाक खानेपानी उपभोक्ता समितिको सचिव, राखी मिजुरे सडक उपभोक्ता समितिको सचिव रहेर काम गरेका थिए ।
लामिछानेको आइतबार अन्त्येष्टि गरिएको छ । उनको शवमा नेपाली कांग्रेस गण्डकी प्रदेशका महामन्त्री विष्णुप्रसाद लामिछाने, पूर्वमन्त्री तथा कास्की कांग्रेस पूर्वसभापति यज्ञबहादुर थापा, कास्की कांग्रेसका निर्वतमान सभापति कृष्ण केसी, महाधिवेशन प्रतिनिधि विकास गुरुङलगायतले कांग्रेसको झण्डा ओढाएर अन्तिम श्रद्धाञ्जली अर्पण गरेका थिए । लामिछानेका श्रीमती, दुई छोरा, चार छोरी छन् ।
यसैबीच नेपाली कांग्रेस कास्की, कांग्रेस कास्की क्षेत्र नं १ र पोखरा महानगर कार्यसमितिले लामिछानेको निधनप्रति दुःख व्यक्त गरेको छ । कांग्रेस पार्टी सभापति किशोरदत्त बराल, कांग्रेस क्षेत्र नं १ का सचिव सरोज केसी र पोखरा महानगर सचिव टुवराज बास्तोलाले लामिछानेको निधनले पार्टीका लागि अपूरणीय क्षति पुगेको बताएका छन् ।
