पोखरा । धादिङ-पोखरा सम्पर्क समाजको नयाँवर्ष २०८२ को शुभकामना आदानप्रदान तथा भत्तेपात्रो विमोचन कार्यक्रम सम्पन्न भएको छ ।
कार्यक्रम उद्घाटन गर्दै कास्की प्रहरी प्रमुख प्रहरी उपरीक्षक श्यामबाबु ओलियाले धादिङवासीको एकताप्रति आफू निकै खुशी लागेको बताए ।
जुनसुकै समस्या परे पनि निर्धक्कसँग प्रहरीमा जानकारी गराउन उनले आग्रह गरे ।
अहिलेको समस्या आर्थिक विचलनको मात्र भएको भन्दै उनले प्रहरीको ९५ प्रतिशत काम यसैमा केन्द्रित भएको बताए ।
प्रहरी र नागरिकको समन्वयले मात्र समाजमा शान्ति अमनचयन कायम गर्न सकिने उनले स्पष्ट पारे । उनले जसले जहाँ कारोबार गरे पनि प्रमाणका आधारमा मात्र गर्न आग्रह गरे ।
पोखरा चेम्बर अफ कमर्स कास्कीका अध्यक्ष उमराज बास्तोलाले धादिङ समाजको सामाजिक काम निकै उत्कृष्ट भएको भन्दै प्रशंसा गरे । उनले केही सामाजिक काममा समाज र पोखरा चेम्बर अफ कमर्स कास्कीले सहकार्य गरेर अघि बढ्न सकिने बताए ।
पोखरा उद्योग वाणिज्य संघका उपमहासचिव सुदीप प्रधानांगले व्यवसायी एकतामा सबै संघसंस्थाले हातेमालो गर्नुपर्ने बताए ।
बर्दिया पोखरा सम्पर्क समाजका अध्यक्ष पुष्पा मरासिनीले सबै समाजले सहकार्य गरेर अन्तर समाज महासंघलाई क्रियाशील बनाउनुपर्नेमा जोड दिइन् ।
कार्यक्रममा अर्घाखाँची-पोखरा सम्पर्क समाजका अध्यक्ष दधिराम खनाल, लागुऔषध नियन्त्रण तथा समाज सुधार आमा समूहका अध्यक्ष कल्पना आचार्य, समाजका निवर्तमान अध्यक्ष रामप्रसाद पाण्डे राजु, पूर्वअध्यक्ष नवराज दुवाडी र गोकर्ण लम्साल, सल्लाहकार रामकृष्ण दुवाडी, कमलबहादुर पाण्डे, धादिङ त्रिपुरा बाराही महिला समूहका उपाध्यक्ष रचना अधिकारी, कार्यक्रम संयोजक तथा समाजका सचिव युवराज खनाललगायतले बोलेका थिए ।
समाजका अध्यक्ष सरस्वती श्रेष्ठको अध्यक्षतामा भएको कार्यक्रममा स्वागत वरिष्ठ उपाध्यक्ष टीकाबहादुर लम्सालले र सञ्चालन महासचिव प्रकाश दुलालले गरेका थिए ।
कार्यक्रममा भित्तेपात्रो प्रकाशनमा महत्त्वपूर्ण सहयोग गर्ने राजेन्द्र पाण्डे, लालप्रसाद ढकाललगायतका दातालाई प्रशंसापत्रद्वारा सम्मान गरिएको थियो ।
