पोखरा महानगरपालिका वडा नं. १७ बिरौटामा भव्य रूपमा सञ्चालन भइरहेको ऐतिहासिक श्री गण्डकी कोटिहोम महायज्ञ २०८२ को पूर्वसन्ध्यामा आयोजित श्रीमद्भागवत कथा प्रवचन कार्यक्रम अहिले पोखरावासीको आकर्षणको केन्द्र बनेको छ। उक्त धार्मिक अनुष्ठानमा स्थानीय श्रद्धालु, साधु–सन्त, विद्वान आचार्य, लब्धप्रतिष्ठित व्यक्तित्व तथा राजनीतिक नेतृत्वको उल्लेखनीय उपस्थिति देखिएको छ।
शनिबार श्रीमद्भागवत कथा प्रवचनको प्रमुख आकर्षण पोखरा महानगरपालिका वडा नं. २ का वडा अध्यक्ष दिवशमान प्रधानाङ्गा थिए। कार्यक्रमको उद्घाटन समारोहमा सहभागी भएका अध्यक्ष प्रधानाङ्गाले उक्त महायज्ञ उपयुक्त स्थानमा सञ्चालन भएको उल्लेख गर्दै सम्पूर्ण पोखरावासी तथा नेपाली जनसमुदायलाई यसलाई सफल बनाउन आह्वान गरे।
उनले भने, “ऐतिहासिक श्री गण्डकी कोटिहोम महायज्ञ २०८२ सुन्दर नगरी पोखरामा, जनसांख्यिक र भौगोलिक हिसाबले अत्यन्त उपयुक्त स्थानमा सञ्चालन भइरहेको छ। यो केवल धार्मिक कार्यक्रम मात्र होइन, यसले हाम्रो सांस्कृतिक पहिचानलाई अन्तर्राष्ट्रियस्तरमा पुर्याउने क्षमता राख्दछ।”
वडा अध्यक्ष दिवशमान प्रधानाङ्गाले धार्मिक अनुष्ठानलाई सामाजिक एकता, राष्ट्रिय पहिचान र धार्मिक सहिष्णुताको महत्वपूर्ण माध्यमको रूपमा वर्णन गरे। “हामी सबै मिलेर यस्ता महायज्ञ र कथा प्रवचनलाई सफल बनाउनु हाम्रो साझा दायित्व हो। विशेषगरी पोखरावासीले यो अवसरलाई धर्म, संस्कृति र पर्यटन प्रवर्द्धनको माध्यमको रूपमा प्रयोग गर्नु अत्यन्त जरुरी छ,” उनले जोड दिए।
उनका अनुसार पोखरा आफैँमा पर्यटकीय नगरी भएकाले यस्ता कार्यक्रमहरूले शहरको धार्मिक र ऐतिहासिक महत्वलाई थप उजागर गर्नेछ। “यो महायज्ञ पोखरालाई विश्वव्यापी स्तरमा चिनाउन, यहाँको धार्मिक पर्यटन विकास गर्न र ‘नेपाल भ्रमण वर्ष’ जस्ता महत्त्वाकांक्षी योजनालाई सफल पार्न महत्त्वपूर्ण भूमिका खेल्नेछ,” अध्यक्ष प्रधानाङ्गाले थपे।
शनिबार कथा प्रवचनको प्रारम्भ देवी प्रतिभा जीबाट गरिएको थियो। उनले श्रीमद्भागवत महापुराणका सन्दर्भमा धर्म, कर्म, भक्ति र सत्कर्मका विषयमा गहिरो विश्लेषण प्रस्तुत गरिन्। उनले सामाजिक र आध्यात्मिक जागरणको आवश्यकता औंल्याउँदै उपस्थित भक्तजनलाई सत्य र धर्मको मार्गमा लाग्न प्रेरणा दिइन्।
यसका अतिरिक्त आचार्य शीतलकृष्ण महाराज लगायत अन्य विद्वान पण्डितहरूले पनि धर्मशास्त्रका गूढ पक्षहरू प्रस्तुत गर्दै आध्यात्मिक ज्ञानको वितरण गरेका थिए। प्रवचन सुन्नका लागि पोखरा र आसपासका क्षेत्रका हजारौं भक्तजनको उपस्थिति रहेको थियो।
कार्यक्रमका आयोजकहरूले सम्पूर्ण पोखरावासीलाई महायज्ञमा सहभागी भइ सहयोग गर्न आह्वान गरेका छन्। उनीहरूले दैनिक प्रवचन सुन्न र भजनकीर्तनमा सहभागिता जनाउन आग्रह गरेका छन्। साथै, सामाजिक सञ्जालमार्फत कार्यक्रमको प्रचारप्रसार भइरहेको छ, जसले गर्दा देश–विदेशमा रहेका नेपालीसमेत कार्यक्रमप्रति आकर्षित हुने अपेक्षा गरिएको छ।
गण्डकी कोटिहोम महायज्ञ २०८२ केवल एक धार्मिक अनुष्ठान नभई धार्मिक, सांस्कृतिक र सामाजिक चेतनाको पुनर्जागरण हो। यसमा वडा अध्यक्ष दिवशमान प्रधानाङ्गाजस्ता जनप्रतिनिधिको सक्रिय सहभागिता र नेतृत्वले अझै बल थपेको छ। यदि सम्पूर्ण पोखरावासी तथा भक्तजनले एकताबद्ध भएर साथ दिएमा, यो महायज्ञ न केवल सफल हुनेछ, बरु यो पोखराको धार्मिक पर्यटन विकासमा ऐतिहासिक पाइला सावित हुनेछ।
