पोखरा । हाल देशमा पश्चिमी वायु र स्थानीय वायुको प्रभाव रहेको छ । यसका साथै बङ्गालको खाडीबाट भित्रिएको जलवाष्पयुक्त हावाको पनि आंशिक प्रभाव रहेको बताइन्छ ।
जसको प्रभावले गण्डकी प्रदेशको राजधानी पोखरामा आज बिहानैदेखि वर्षा भइरहेको छ ।
वर्षाका कारण मजदुर दिवसमा आयोजित कार्यक्रम प्रभावित बनेको छ । आज बिहान ९:०० बजे यो समाचार तयार गर्दा पोखरामा वर्षा भइरहेको छ भने आज दिनभर पनि बादल लाग्ने र हल्का वर्षाको सम्भावना छ ।
साथै पोखरामा बिहानको तापक्रम २१ डिग्री सेल्सियस रहको छ भने सापेक्षित आद्रता ६६ प्रतिशत छ ।
मौसम पूर्वानुमान महाशाखाका अनुसार आज दिउँसो देशभर आंशिकदेखि साधारणतया बदली रहने भने पोखरामा आज बिहानैदेखि वर्षा भइरहेको छ ।
आज देशका पहाडी भूभागका थोरै स्थानमा मेघगर्जन र चट्याङ्गसहित हल्कादेखि मध्यम वर्षाको सम्भावना छ । बाँकी भूभागका एक, दुई स्थानमा पनि यस्तो वर्षाको सम्भावना छ ।
देशका हिमाली भूभागका थोरै स्थानमा हल्का वर्षा र हिमपातको समेत सम्भावना रहेको विभागले जनाएको छ ।
आज राति देशको पहाडी भूभागमा आंशिकदेखि साधारणतया बदली रहनेछ भने बाँकी भूभागमा मौसम मुख्यतया सफादेखि आंशिक बदली रहनेछ । देशको पहाडी भूभागका एक, दुई स्थानमा मेघगर्जन र चट्याङसहित हल्का वर्षाको सम्भावना छ ।
गण्डकी, कोशी, बागमती र प्रदेशको हिमाली भूभागका एक, दुई स्थानमा हल्का वर्षा र हिमपातको सम्भावना महाशाखाले आफ्नो बुलेटिनमा उल्लेख गरेको छ ।
