नेपाली काँग्रेसका नेता विमलेन्द्र निधीले संघीय लोकतान्त्रिक गणतन्त्रको पक्षमा जनमत सिर्जना गर्न प्रवासी नेपालीलाई आग्रह गर्नुभएको छ ।
नेपाली कँंग्रेसको जनसम्पर्क समितिद्वारा बिहीवार पार्टी केन्द्रिय कार्यालय सानेपामा आयोजित कार्यक्रममा बोल्दै उहाँले यस्तो आग्रह गर्नुभएको हो । उहाँले नेपाली जनसम्पर्क समिति पहिलो पटक विपी कोईरालाले भारतमा स्थापना गरेको बताउनु भयो । उहाँले विश्वभर क्रियाशिल रहेको काँग्रेसको जनसम्पर्क समितिले सबै प्रवासीसँग सम्बन्ध राख्ने बताउनु भयो । उहाँले प्रवासी नेपालीहरुलाई हुने कानूनी समस्यालाई समाधान गर्न पार्टीको तर्फबाट पहल गर्ने बताउनु भयो । प्रवासी नेपालीले देशको विकासका लागि आर्थिक तथा वैचारिक योगदान गर्नुपर्ने उहाँको भनाइ छ ।
उहाँले भन्नुभयो, ‘नेपाली जनसम्पर्कको स्थापना बिपी कोइरालाले भारतको बम्बईमा गर्नुभएको थियो । र आज ३७ वटा देशमा जुन बेला भारतमा मात्रै थियो त्यसमा पनि बम्बईमा बढी नेपालीहरु बस्ने भएकाले त्यहाँबाट प्रारम्भ भएको । नेपाली काँग्रेस र नेपालमा प्रजातान्त्रिक आन्दोलनलाई ऊर्जा प्रदान गर्न, सफलता प्रदान गर्नका लागि रिस्क लिएर गरिएको थियो । अजाको सन्दर्भमा नेपामा संघीय लोकतान्त्रिक गणतन्त्रात्मक शासन प्रणालीलाई अवलम्वन गरेका छौँ । एउटा कुरा के हो भने जनसम्पर्क समन्वय विभागले संसारमा रहेको नेपाली दाजुभाइहरु खास गरेर नेपाली कांग्रेससँग सम्बन्धित सरोकार राख्नेहरुको दुई तीन किसिमको भूमिकाका लागि हामी अनुरोध गर्दछौँ । एउटा नेपालको व्यवस्था संघीय लोकतान्त्रिक गणतन्त्रात्मक प्रणालीको पक्षमा राजनीतिक रुपमाले जनमत र समर्थन सिर्जना गर्नका लागि म अनुरोध गर्न चाहन्छु । दोस्रो कुरा नेपालको आर्थिक प्रगतिमा प्रवासमा बस्ने दाजुभाइहरुको तर्फबाट वैचारिक वा आर्थिक जे योगदान हुनसक्छ त्यस्तो भुमिकाका लागि पनि अनुरोध गर्न चाहन्छु । तेस्रो कुरा २०८४ मा हुने नेपाली काँग्रेसको चुनावमा तपाईहरुको बाहिरबाट र देशभित्रबाट नेपाली काँग्रेसको पक्षमा मतदान कसरी हुनेछ त्यसका लागि पनि सहयोग गर्न सक्रिय भैदिन अनुरोध गर्दछु ।’
नेता निधीले २०८४ मा हुने निर्वाचनमा नेपाली कांग्रेसको पक्षमा मतदान गर्न सहयोग गर्न प्रवासी नेपालीहरुलाई आग्रह गर्नुभयो ।
