पोखरा । बागलुङको ढोरपाटन नगरपालिका वडा नं ५ अस्तु बतासेडाँडामा भएको जीप दुर्घटनामा मृत्यु हुनेको सङ्ख्या चार पुगेको छ ।
दुर्घटनामा परी गम्भीर घाइते भएकी ढोरपाटन-२ की २१ वर्षीया टीकाकुमारी कुँवरलाई थप उपचारका लागि पोखरा ल्याउँदै गर्दा बाटोमै र ७५ वर्षीया मनकुमारी थापाको पोखरास्थित मणिपाल अस्पतालमा उपचारको क्रममा आज बिहान मृत्यु भएको इलाका प्रहरी कार्यालय बुर्तिबाङका प्रमुख प्रहरी निरीक्षक आनन्द बस्नेतले जानकारी दिए ।
ढोरपाटन-२ का ७० नरबहादुर कार्की र ७५ वर्षीया भीमकुमारी बुढाको घटनास्थलमै मृत्यु भएको थियो ।
शुक्रबार साँझ बुर्तिबाङ बजारदेखि ढोरपाटन नगरपालिका वडा नं ५ चौर जाँदै गरेको लु प्र ०१००१ च १७७५ नम्बरको जीप सडकबाट करिब एक सय ५० मिटर तल खसेर दुर्घटना भएको थियो ।
दुर्घटनामा जीप चालक बागलुङ ढोरपाटन-२ का २७ वर्षीय गोविन्द थापा, १८ वर्षीया लुम्बिनी महत, २३ वर्षीया इन्द्रा कुँवर, २९ वर्षीया निरमाया खत्री, ३८ वर्षीया देवी परियार, ५३ वर्षीया दुर्गी दर्जी, १२ वर्षीया अञ्जु परियार, ८ वर्षीय वियानो बुढा मगर, ५ वर्षीय विनय बुढा, ढोरपाटन नगरपालिका-५ की ३५ वर्षीया डल्ली विक, ढोरपाटन-१ का ११ वर्षीय शिशिर कार्की र ढोरपाटन-५ की ३० वर्षीया टनमाया कुँवर घाइते घाइते भएका छन् ।
केही घाइतेलाई थप उपचारका लागि पोखरास्थित मणिपाल अस्पताल पोखरा ल्याइएको छ भने केहीलाई मिसन अस्पताल पाल्पा लगिएको छ । जीपमा १६ जना सवार रहेको पाइएको प्रहरीले जनाएको छ ।
