पोखरा | पोखरा महानगरपालिका वडा नं. ५ स्थित मालेपाटन खेलमैदानमा आगामी श्रावण १६ गते, शुक्रबार, “दोस्रो मालेपाटन खुल्ला लाखेनाच प्रदर्शन तथा सांस्कृतिक कार्यक्रम – २०८२” भव्य रुपमा आयोजना गरिने भएको छ। सांस्कृतिक पुनर्जागरणका दृष्टिले अत्यन्तै महत्वपूर्ण मानिएको यो कार्यक्रम ताया: मचा नाच समिति, मालेपाटनको मुख्य आयोजनामा तथा नेवाः मिसाः पुचः इकाई ५, मालेपाटन ल्यांहः पूँचः, र मालेपाटन नेवा गुठीको सह–आयोजनामा सम्पन्न हुने जनाइएको छ। आयोजकहरूले कार्यक्रमलाई पोखराको सांस्कृतिक पहिचानसँग जोडिएको गौरवमय अवसरको रूपमा लिएका छन्, जसमा १५,००० भन्दा बढी दर्शकको सहभागिता अपेक्षा गरिएको छ।
कार्यक्रमको प्रमुख आकर्षणको रूपमा पोखराका विभिन्न स्थानहरूबाट सहभागी २० भन्दा बढी लाखे नाच समूहहरूद्वारा प्रस्तुत गरिने जीवित नृत्य र सांस्कृतिक प्रस्तुतीहरू रहने छन्। लाखे नाच, जुन नेवारी समुदायको एक ऐतिहासिक एवं धार्मिक सांस्कृतिक सम्पदा हो, यस कार्यक्रममार्फत संरक्षण र प्रवर्द्धनको अभियानस्वरूप प्रस्तुत गरिनेछ। कार्यक्रममा परम्परागत वेशभूषा, नेवारी बाजागाजा, नृत्य, तथा सांस्कृतिक भावनालाई उजागर गर्ने विविध प्रस्तुतीहरू प्रस्तुत गरिनेछन्, जसले समग्र पोखरालाई सांस्कृतिक उत्सवको केन्द्रबिन्दुमा ल्याउने विश्वास गरिएको छ।
उक्त कार्यक्रमका प्रमुख उद्देश्यहरूमा लाखे नाचको संरक्षण तथा सम्वर्द्धन, परम्परागत कला र संस्कृति मार्फत पर्यटन प्रवर्द्धन, वडा नं. ५ लाई सांस्कृतिक वडाको रूपमा स्थापित गर्ने, नवपुस्तालाई मौलिक परम्परामा आकर्षित गर्दै संस्कृतिप्रति चेतना जगाउने, नयाँ कलाकार उत्पादन तथा नेतृत्व विकास, स्थानीय हस्तकला र नेवारी खानाको प्रवर्द्धन गर्दै स्व–रोजगार सिर्जना, र समुदायहरू बीच सहकार्य तथा सांस्कृतिक सद्भाव सुदृढ गर्नु रहेका छन्।
कार्यक्रमको व्यवस्थापन तथा समन्वयको लागि विभिन्न संयोजन समिति गठन गरिएको छ। विनय श्रेष्ठ कार्यक्रम संयोजक, अयुष बाटाजु आर्थिक संयोजक, बसन्त प्रसाद श्रेष्ठ प्रचार संयोजक, र अश्विन राजवंशी नृत्य संयोजकको रूपमा जिम्मेवारीमा रहेका छन्। उनीहरूले कार्यक्रमको सम्पूर्ण व्यवस्थापन र समन्वयलाई सफल बनाउन विभिन्न तयारीहरूलाई अन्तिम चरणमा पुर्याइरहेका छन्।
कार्यक्रमले पोखरामा मौलिक संस्कृति र सम्पदाको प्रवर्द्धन गर्न ठूलो योगदान दिने आयोजकहरूको विश्वास छ। खासगरी युवापुस्तालाई आफ्ना जरा, इतिहास र सांस्कृतिक सम्पदाप्रति जागरुक बनाउने प्रयासस्वरूप यो कार्यक्रम आयोजना गरिएको हो। सामाजिक सद्भाव, सांस्कृतिक एकता, र स्थानीय पहिचानको संरक्षणमा केन्द्रित यस्तो किसिमका कार्यक्रमहरूले पोखराको सामाजिक एवं सांस्कृतिक जीवनमा दीर्घकालीन प्रभाव पार्ने अपेक्षा गरिएको छ।
