युक्रेनमा रुसी आक्रमणः ९ जनाको मृत्यु, ४० घाइते

युक्रेनी अधिकारीहरूले सोमवार बताएअनुसार युक्रेनका खार्किभ र जापोरिज्झिया शहरहरूमा रुसी आक्रमणमा कम्तिमा नौ जनाको मृत्यु र ४० जना घाइते भएका छन् । युक्रेनको दोस्रो ठूलो शहर खार्किभमा, शाहेद लडाकू ड्रोनले शहरको औद्योगिक जिल्लाको एक अग्लो आवासीय भवनमा प्रहार गर्दा ६ जनाको मृत्यु र २० जना घाइते भएको मेयर इहोर तेरेखाले बताउनु भयो । राज्य आपतकालीन सेवाले पीडितहरूमा एक वर्षीया बालिका र एक १६ वर्षीय किशोर रहेको रिपोर्ट गरेको छ । घाइतेहरूमा ६ जना बालबालिका पनि छन् । १४० आपतकालीन कर्मचारी र ३९ इकाइ उपकरणहरू घटनास्थलमा काम गरिरहेका छन् । दक्षिणपूर्वी शहर जापोरिज्झियामा, रुसको आक्रमणमा तीन जनाको मृत्यु र २० जना घाइते भएको क्षेत्रका गभर्नर इभान फेडोरोभले बताउनु भयो । घाइतेहरूमध्ये धेरैलाई गम्भीर अवस्थामा अस्पतालमा भर्ना गरिएको छ भने आवासीय भवनहरू, एउटा उद्यम, एउटा बस स्टप र व्यावसायिक परिसरमा क्षति पुगेको छ ।
युक्रेनको वायुसेनाले भन्यो कि रूसले रातारात १४० ड्रोन र चार इस्केन्डर–एम ब्यालिस्टिक मिसाइल प्रहार गरेको छ । जसमा ८८ ड्रोनहरू खसालिएका छन् र अन्य प्रोजेक्टाइलहरू ६ क्षेत्रहरूमा २५ स्थानहरूमा लक्षित छन् ।