राप्ती गाउँपालिका–१ का ६० वर्षीय श्यामलाल बोहराको जापानिज इन्सेफ्लाइटिस सङ्क्रमणका कारण मृत्यु भएको जिल्ला स्वास्थ्य कार्यालय दाङले जनाएको छ । साउन १८ गते इन्सेफ्लाइटिस सङ्क्रमण भएपछि उपचारका लागि बुटवल लगिएको र उपचारकै क्रममा उहाँको भदौ २ गते मृत्यु भएको जिल्ला स्वास्थ्य कार्यालय दाङका किटजन्य सरुवा रोग फोकल पर्सन कमल चन्दले जानकारी दिनुभयो ।
दाङमा अन्य तीन जनामा पनि जापानिज इन्सेफ्लाइटिस सङ्क्रमण पुष्टि भएको छ । तुलसीपुर उपमहानगरपालिका–१२ की २६ वर्षीया एक महिला, गढवा गाउँपालिका–६ का ३६ वर्षीय एक पुरुष र राप्ती गाउँपालिका–६ का ११ वर्षीय एक बालकमा जापानिज इन्सेफ्लाइटिस सङ्क्रमण पुष्टी भएको हो । सङ्क्रमित बालकको राप्ती स्वास्थ्य विज्ञान प्रतिष्ठान घोराहीमा, महिलाको चितवन मेडिकल कलेजमा र अर्को एक जना पुरुषको कोहलपुर मेडिकल कलेजमा उपचार भइरहेको फोकल पर्सन चन्दले जानकारी दिनुभयो ।
जापानिज इन्सेफ्लाइटिसको सङ्क्रमण देखिएपछि जिल्ला स्वास्थ्य कार्यालयले दाङको गढवा गाउँपालिका–६ र राप्ती गाउँपालिका–१ बाट नमूना सङ्कलन गरेको छ । भदौ ३ गते राप्ती गाउँपालिका–१ बाट जरो आएका १२ जनाको र त्यतिकै सङ्ख्यामा गढवा गाउँपालिका–६ बाट रगतको नमूना सङ्कलन गरिएको स्वास्थ्य कार्यालयले जनाएको छ । सङ्कलित नमुना परीक्षणका लागि राष्ट्रिय जनस्वास्थ्य प्रयोगशाला काठमाडौँमा पठाइने फोकल पर्सन चन्दले जानकारी दिनुभयो ।
