संस्कृति, पर्यटन तथा नागरिक उड्डयनमन्त्री बद्रीप्रसाद पाण्डेले नेपालको संस्कृति र प्रकृतिलाई विश्वसामु चिनाउनुपर्ने आवश्यकता रहेको बताउनुभएको छ । शुक्रवारदेखि काठमाडौंमा शुरु भएको नेपाल कला तथा संस्कृति महोत्सवको उद्घाटन समारोहलाई सम्बोधन गर्दै मन्त्री पाण्डेले यस्तो बताउनुभएको हो । उहाँले नेपालका हिमालदेखि सांस्कृतिक धरोहरसम्मका आफ्ना कथा र गौरवलाई अन्तर्राष्ट्रिय तहमा प्रचारप्रसार गर्नुपर्नेमा जोड दिनुभयो । उहाँले अन्नपूर्ण, शंकर हिमाल र सगरमाथा जस्ता हिमश्रृंखलामा निहित ऐतिहासिक तथा सांस्कृतिक कथालाई समेत उजागर गर्न जरुरी रहेको बताउनु भयो ।
उहाँले यस महोत्सवबाट नेपालको कला तथा सांस्कृतिक मेलालाई विश्वसामु चिनाउन महत्वपूर्ण योगदान गर्ने विश्वास व्यक्त गर्नुभयो । नेपालको पर्यटन प्रवद्र्धनमा नेपाल कला परिषद्को महत्वपूर्ण योगदान रहेको भन्दै उहाँले प्रशंसा गर्नुभयो ।उहाँले भन्नुभयो, ‘हामीले हाम्रो संस्कति र हाम्रो प्रकृतिलाई विश्वसामू देखाउनुपर्नेछ । हाम्रो आफ्नै कथाहरु र यसका गौरवहरु समेत छन् । हाम्रा हिमालहरुलाई समेत विश्वसामु चिनाउनु पर्नेछ । अन्नपूर्ण हिमाल त्यसै अन्नपूर्ण हिमाल भएको होइन । त्यसका पछाडिको कथा छ । शंकर हिमाल एउटा पर्वत हिमश्रृंखलाको रुपमा मात्रै छैन । त्यसका पछाडि पनि कथा छन् । सगरमाथाका पछाडि पनि कथा छ ।
यी कथाहरुलाई हामीले प्रकृतिका कथा र संस्कृतिका कथाहरु जसमा हाम्रो पुर्खाको योगदान समेत मिसिएको छ । यो दिशामा आर्ट काउन्सिलले लामो समयदेखि काम गरिरहको छ । यद्धपी सरकारको सहयोग कहिले प्राप्त भएको छ त कहिले प्राप्त भएको छ । सरकारको सहयोग प्राप्त हुँदा वा नहुँदा अविछिन्न ढंगले जुन काम अगाडि बढाएको छ । हामीले सरकार र निजी क्षेत्रलाई समन्वय गर्ने भएकोले पर्यटन बोर्डलाई पनि यहाँ जोडेका हौँ । महोत्सवलाई सफल बनाएर यसले संस्कृति र पर्यटनको क्षेत्रमा एउटा बाटो देखाओस् भन्ने कामना गर्दछु ।’
पर्यटनको माध्यमबाट आर्थिक समृद्धि हासिल गर्न सरकार क्रियाशील रहेको समेत मन्त्री पाण्डेको भनाइ छ ।
