मंगलवार टर्कीको दक्षिणी प्रान्त मर्सिनको एर्डेम्ली जिल्लामा कृषि कामदार बोकेको मिनीबस पल्टिँदा पाँच जनाको मृत्यु भएको छ । साथै अन्य १४ जना घाइते भएको अर्ध–सरकारी अनाडोलु एजेन्सीले जनाएको छ । मिनीबस जिल्ला केन्द्रतर्फ जाँदै गर्दा चालकले स्टेयरिङको नियन्त्रण गुमाएको बताइएको छ ।
जसका कारण गाडी सडक किनारको खाल्डोमा लगभग १० मिटर खसेको थियो । प्रत्यक्षदर्शीहरूको फोनपछि अग्नि नियन्त्रक, चिकित्सा टोली र जेन्डरमेरी एकाइहरू सहित आपतकालीन सेवाहरू घटनास्थलमा पठाइएको थियो । घाइतेहरूलाई उपचारको लागि नजिकैको अस्पतालमा लगिएको छ । दुर्घटनाको कारणको बारेमा अनुसन्धान भइरहेको रिपोर्टमा भनिएको छ । सुरक्षा महानिर्देशनालयका अनुसार २०२४ मा टर्कीभर ट्राफिक दुर्घटनाले २ हजार ७ सय १३ जनाको ज्यान लिएको छ । इस्तानबुल, अंकारा र इज्मिरमा सबैभन्दा धेरै दुर्घटना भएका छन् । इस्तानबुलमा मात्र ९७ हजार ३ सय ५४ घटनाहरू रेकर्ड गरिएका छन् । गत वर्ष टर्कीमा घातक दुर्घटनाहरूको प्रमुख कारण तिब्र गति थियो ।
