पोखरा । कास्की निर्वाचन क्षेत्र नम्बर १ बाट प्रतिनिधि सभा सदस्यका लागि राष्ट्रिय स्वतन्त्र पार्टी (रास्वपा) ले केन्द्रीय सदस्य गनेस पौडेललाई उम्मेदवार बनाउने निर्णय गरेको छ । पार्टीले उम्मेदवारको अन्तिम टुंगो लगाएपछि पौडेलले यसलाई आफ्नो व्यक्तिगत उपलब्धिको रूपमा मात्र नभई एउटा गह्रुँगो जिम्मेवारीका रूपमा लिएको बताएका छन् । कास्कीमा चुनावी सरगर्मी बढिरहेका बेला रास्वपाले युवा नेता पौडेललाई चुनावी मैदानमा उतारेको हो ।
उम्मेदवार चयन भएपछि सामाजिक सञ्जालमार्फत आफ्नो धारणा सार्वजनिक गर्दै पौडेलले यो मनोनयनलाई जितमा बदल्ने संकल्प गरेका छन् । ‘यो मनोनयनलाई जितमा बदल्ने संकल्प लिँदै म जेनजी आन्दोलनका सम्पूर्ण महान शहीदहरू, घाइतेहरू तथा वैकल्पिक राजनीतिको आन्दोलनलाई यहाँसम्म ल्याइपुर्याउनु हुने सम्पूर्ण पार्टी सहयात्रीहरूलाई त्यो जित अर्पण गर्ने अठोट व्यक्त गर्न चाहन्छु,उनले भनेका छन् । उनले आफ्नो उम्मेदवारीलाई विश्वास र जिम्मेवारीको बोझका रूपमा व्याख्या गरेका छन् ।
पौडेलले आफूमाथि भरोसा गरेकोमा पार्टी नेतृत्व, सहयात्री र शुभेच्छुकप्रति आभार प्रकट गरेका छन् । यो यात्रा सबैको साथ, सुझाव र आलोचनासँगै अघि बढ्ने बताउँदै उनले परिवर्तनका लागि आफूहरू तयार भएर आएको संकेत गरेका छन् । ‘हामी आउँदैछौँ भन्दै उनले चुनावी अभियानमा सक्रियतापूर्वक लाग्ने प्रतिबद्धता जनाएका छन् । वैकल्पिक राजनीतिको मुद्दा बोकेर चुनावी मैदानमा होमिएका पौडेलले युवा र नयाँ पुस्ताको आवाजलाई सदनसम्म पुर्याउने मुख्य एजेन्डा बनाएका छन् । पार्टीको सचिवालय तहमा भएको छलफल र आकांक्षीहरूको मूल्यांकनका आधारमा उनलाई कास्की क्षेत्र नम्बर १ को टिकट दिइएको रास्वपाले जनाएको छ । यस क्षेत्रमा अन्य दलहरूले पनि आफ्ना उम्मेदवारहरू सिफारिस गरिरहेका बेला रास्वपाको यो निर्णयले चुनावी प्रतिस्पर्धालाई थप रोचक बनाएको छ ।
