रेन्बो एकेडेमिक होम्सको ३०औँ वार्षिकोत्सव, अभिभावक दिवस तथा पुरस्कार वितरण सम्पन्न

पोखरा-१५ स्थित रेन्बो एकेडेमिक होम्स माध्यमिक विद्यालयको ३०औँ वार्षिकोत्सव, अभिभावक दिवस तथा पुरस्कार वितरण कार्यक्रम दुई दिने समारोहका साथ सम्पन्न भएको छ । बुधबार प्रि–नर्सरीदेखि कक्षा ३ सम्म र बिहीबार कक्षा ४ देखि १२ सम्मका विद्यार्थी सहभागी हुने गरी कार्यक्रम आयोजना गरिएको थियो ।
कार्यक्रमका प्रमुख अतिथि गण्डकी विश्वविद्यालयका कुलपति प्राडा. ईन्द्रप्रसाद तिवारीले विद्यार्थी जीवनबाटै असल संस्कार र व्यवहारिक सीप विकास गर्नुपर्नेमा जोड दिए । प्रविधिको तीव्र विकास भइरहेको वर्तमान सन्दर्भमा शिक्षा किताबी मात्र नभई प्रयोगात्मक हुनुपर्ने उल्लेख गर्दै उनले अन्तर्राष्ट्रिय मापदण्डअनुसार जुनसुकै देश र परिवेशमा घुलमिल हुन सक्ने दक्ष जनशक्ति उत्पादन गर्नु विद्यालय र शिक्षकको मुख्य जिम्मेवारी भएको बताए ।
शिक्षा विकास तथा समन्वय इकाइ कास्कीका प्रमुख लोकनाथ आचार्यले सक्षम विद्यार्थी निर्माणमा विद्यालय र शिक्षकसँगै अभिभावकको भूमिका अत्यन्त महत्वपूर्ण रहेको बताए । व्यस्त जीवनशैलीका बाबजुद पनि छोराछोरीका लागि समय दिन अभिभावक गम्भीर हुनुपर्ने उनको भनाइ थियो । गर्भावस्थादेखि नै सकारात्मक वातावरण निर्माण नगरेसम्म बालबालिकाको सर्वाङ्गीण शैक्षिक विकास सम्भव नहुने उनले स्पष्ट पारे ।
विद्यालयका प्राचार्य बाबुराम बरालले विद्यालयका शैक्षिक गतिविधि र भावी योजनाबारे जानकारी गराउँदै विद्यार्थीको उज्ज्वल भविष्यका लागि पोखरा महानगरपालिका, शिक्षा शाखा, शिक्षा विकास तथा समन्वय इकाइ तथा अभिभावकको मार्गनिर्देशनमा विद्यालय अघि बढ्ने प्रतिबद्धता व्यक्त गरे ।
प्याब्सन कास्कीका अध्यक्ष षडानन्द गौतमले शिक्षा कमजोर भए संस्कृति कमजोर हुने र संस्कृति बिग्रे देश नै कमजोर हुने धारणा व्यक्त गरे । विद्यार्थीमा ‘प्रयास गरे जितिन्छ, नत्र सिकिन्छ’ भन्ने सकारात्मक सोच विकास गर्न आवश्यक रहेको उनले बताए ।
कार्यक्रममा विद्यालयले २०८१ सालको एसइई परीक्षामा जिपिए ४ ल्याउने विद्यार्थी सुरज भुजेललाई नगद १ लाख रुपैयाँसहित सम्मान गरेको छ । यस्तै, कक्षा ८ को परीक्षामा जिपिए ४ ल्याउने स्वीकृति भण्डारीलाई १० हजार रुपैयाँ नगद, दोसल्ला र प्रमाणपत्र प्रदान गरिएको छ । आगामी वर्षहरूमा पनि उत्कृष्ट नतिजा ल्याउने विद्यार्थीलाई सम्मान गरिने विद्यालयले जनाएको छ ।
विद्यालय व्यवस्थापन समिति अध्यक्ष सुशीलराज पराजुलीको अध्यक्षतामा सम्पन्न कार्यक्रममा विद्यार्थीहरूले सांस्कृतिक प्रस्तुति प्रस्तुत गरेका थिए । दीर्घसेवा सम्मानअन्तर्गत १० वर्षदेखि निरन्तर सेवा गर्दै आएका शिक्षक तथा कर्मचारी जीवन बटाजु, सन्तोष गुरुङ, हेमा पुन, तनाज गुरुङ, शिला पुरी, करिष्मा गुरुङ, अमृता थापा र टीका पाल्पालीलाई सम्मान गरिएको छ ।
विभिन्न मापदण्ड पूरा गरी Student Of The Year’ स्वीकृति भण्डारी घोषित भएकी छन् भने रेन्बो अवार्ड अनमोल, स्वाइन, रायान ढकाल, प्रेक्षा भण्डारी र प्रिन्सिका गुरुङले प्राप्त गरेका छन् । साथै, पूर्व विद्यार्थी सबिन गुरुङ स्मृति तथा विद्यालय संस्थापक होमविक्रम र विजया मल्ल अक्षयकोष अवार्डबाट उत्कृष्ट विद्यार्थी आरुष चापागाईं, माइलिन थापा, आयुष विक र सोफिया गुरुङ सम्मानित भएका छन् ।
कार्यक्रममा विभिन्न अतिथिहरूले शुभकामना मन्तव्य व्यक्त गरेका थिए भने अतिथिहरूलाई विद्यार्थीहरूले निर्माण गरेका चित्रहरू मायाको चिनोस्वरूप प्रदान गरिएको थियो । वार्षिकोत्सवको अवसरमा विद्यालयले रक्तदान कार्यक्रमसमेत आयोजना गरेको छ । साथै, विद्यालयले सरस्वती पूजाका दिन शुक्रबार अक्षराम्भ कार्यक्रम आयोजना गर्ने र सो दिन उपस्थित विद्यार्थीलाई निःशुल्क भर्ना गरिने जानकारी दिएको छ ।