पोखरा, फागुन ६ वेस्ट पोइन्ट चिल्ड्रेन एकेडेमीको १३ औं अभिभावक दिवस विविध कार्यक्रमका साथ सम्पन्न भएको छ।
विद्यालय परिसरमा आयोजित कार्यक्रममा प्रमुख अतिथिका रूपमा हेमप्रसाद आचार्य, पोखरा महानगरपालिका शिक्षा महाशाखा प्रमुखको उपस्थिति रहेको थियो।
कार्यक्रममा विद्यार्थीहरूले नृत्य, गीत, कविता वाचन लगायत विभिन्न सांस्कृतिक प्रस्तुति प्रस्तुत गरेका थिए भने अभिभावकहरूको उल्लेखनीय सहभागिता रहेको थियो।
प्रमुख अतिथि आचार्यले विद्यार्थीहरूको समग्र विकासका लागि विद्यालय र अभिभावकबीच सुदृढ सहकार्य आवश्यक रहेको बताउँदै गुणस्तरीय शिक्षामा विशेष जोड दिनुपर्ने धारणा व्यक्त गरेका थिए।
सो अवसरमा विद्यालयका शिक्षक तथा कर्मचारीहरू प्रकाश पंगेनी, अनिता पौडेल, रिता पौडेल र कमलादेवी राणालाई दोसल्ला ओढाएर तथा प्रमाणपत्र प्रदान गरी दीर्घसेवा सम्मान गरिएको थियो।
त्यसैगरी कार्यक्रममा उत्कृष्ट विद्यार्थीहरूलाई पुरस्कार तथा प्रमाणपत्र वितरण गरिएको विद्यालयले जनाएको छ। २०८० सालको एसईई परीक्षामा उत्कृष्ट नतिजा हासिल गर्ने प्रशंसा क्षेत्री तथा २०८१ सालको एसईई परीक्षामा उत्कृष्ट हुने सन्देश तिवारीलाई विशेष सम्मान गरिएको थियो।
