पोखरा । हिल प्वाइन्ट माध्यमिक विद्यालयले ४५ औं वार्षिकोत्सव तथा अभिभावक दिवस मनाएको छ ।
समारोहमा प्रमुख अतिथि गण्डकी विश्वविद्यालयका उपकुलपति डा. कृष्णराज अधिकारीले घरलाई बालबालिकाको पहिलो पाठशालाका रूपमा परिभाषित गरे । उनले प्रविधिको सदुपयोगले विद्यार्थीको सिकाइ विकासमा सहयोग पुग्ने भए पनि गलत प्रयोगले भयावह समस्या निम्त्याउन सक्ने भन्दै सचेत गराए ।
हिसान केन्द्रीय अध्यक्ष युवराज शर्माले सैद्धान्तिक ज्ञानभन्दा प्राविधिक र व्यावहारिक शिक्षा आजको आवश्यकता भएको उल्लेख गरे । उनले विद्यालयका विद्यार्थीले विभिन्न शैक्षिक प्रदर्शनीमार्फत देखाएको प्रतिभाको प्रशंसा गरे ।
हिसान कास्की अध्यक्षसमेत रहेका विद्यालयका संस्थापक प्राचार्य दिवाकर जैसीले गुणस्तरीय शिक्षालाई नै विद्यालयले मूलमन्त्र भएको उल्लेख गरे । उनले आगामी शैक्षिक सत्रबाट विद्यालयमा रोबोट कक्षा सञ्चालन गर्ने प्रतिबद्धता जनाए ।
कार्यक्रममा प्याब्सन कास्की अध्यक्ष षडानन्द गौतमलगायतले शुभकामना मन्तव्य व्यक्त गरेका थिए ।
सो अवसरमा विद्यालयका उत्कृष्ट शिक्षक, कर्मचारी र विद्यार्थीहरुलाई पुरस्कृत तथा सम्मानित गरियो भने विद्यार्थीले विविध सांस्कृतिक तथा कलात्मक प्रस्तुति देखाए ।
विद्यालय व्यवस्थापन समितिका अध्यक्ष बिजुलीबहादुर गुरुङको अध्यक्षतामा भएको समारोहमा सुपरभाइजर दीव्या लामिछानेले स्वागत र शिक्षक भावना लामिछानेले संचालन गरेका थिए ।
पोखराको माटेपानीस्थित हिल प्वाइन्टमा हाल करिब ८ सय विद्यार्थी पढ्छन् ।
