यही बिहीबार अर्थात् फागुन २१ गते हुन लागेको प्रतिनिधि सभा निर्वाचनलाई लक्षित गर्दै सोमबार मध्यरात १२ बजेदेखि चीनसँग सीमा जोडिएको कोरला नाका बन्द गरिएको छ। मतदानभन्दा ७२ घण्टा अगाडि अन्तर्राष्ट्रिय नाका बन्द गर्नुपर्ने नियम अनुसार जिल्ला प्रशासन कार्यालय मुस्ताङले नाका क्षेत्रलाई पूर्ण रूपमा बन्द गरी एकीकृत सुरक्षा योजना अनुसार सुरक्षा व्यवस्थामा कडाइ गरेको हो।
उपल्लो मुस्ताङको लोमान्थाङ गाउँपालिकामा रहेको नेपाल–चीन २४ नम्बर सीमा स्तम्भस्थित कोरला नाका फागुन १८ गते राति १२ देखि २१ गते राति १२ बजेसम्म बन्द रहने मुस्ताङका सहायक प्रमुख जिल्ला अधिकारी एक नारायण भण्डारीले बताए। नाका बन्द भएसँगै कोरलादेखि करिब १४ किलोमिटर तल रहेको भन्सार कार्यालयसम्मको सडकमा सवारीसाधनमार्फत हुने ढुवानीसहित अन्य गतिविधिलाई समेत प्रहरीले निगरानीमा राखेको छ। निर्वाचनलाई स्वतन्त्र, स्वच्छ, निष्पक्ष र भयरहित वातावरणमा सम्पन्न गर्न चीनसँग सीमा जोडिएका कोरला लगायत अन्य सीमा स्तम्भ रहेका क्षेत्रमा स्थानीयलाई आवतजावत नगर्न प्रशासनले अनुरोध गरेको छ।
समुद्री सतहदेखि ४ हजार ६ सय ५० मिटर उचाइमा रहेको कोरोला नाका क्षेत्रमा बसोबास गर्ने स्थानीय समेत निर्वाचन अवधिमा तलका बस्तीमा झर्नेछन्। उपल्लो मुस्ताङमा निर्वाचन लक्षित बेसक्याम्प बनाएर बसेको नेपाली सेनाको इन्द्र बक्स गणसहित नेपाल प्रहरी र सशस्त्र प्रहरी बलले गस्ती र निगरानी बढाएका छन्। निर्वाचनको दिन सदरमुकाम जोमसोम–कोरला ११० किलोमिटर सडक तथा बेनी–जोमसोम सडकखण्डसहित जिल्लाभर अत्यावश्यक सेवा बाहेकका सवारीसाधन सञ्चालनमा समेत रोक लगाइने प्रशासनले जनाएको छ।
