पोखरा ।प्रतिनिधि सभा निर्वाचनमा प्रत्यक्ष तर्फको मतपरिणाम अनुसार गण्डकी प्रदेशमा नेकपा एमाले र नेपाली कम्युनिस्ट पार्टी (नेकपा) ले एक सिट पनि ल्याउन सकेनन् । कास्की २, मुस्ताङ र म्याग्दीमा दोस्रो स्थानमा आएको एमाले बाँकीमा तेस्रो र चौथोमा सिमित भएको छ । तनहुँ १ मा एमाले उम्मेदवार भगवती न्यौपानेको त जमानत नै जफत भएको छ । १८ मध्ये १५ सिटमा रास्वपाले जितेको छ । २ सिटमा नेपाली कांग्रेस र १ मा स्वतन्त्र उम्मेद्वार विजयी भएका छन् । २०८० मा भएको उपनिर्वाचनमार्फत् गण्डकीबाट संसदीय यात्रा थालेकोे रास्वपाले यो पटकको प्रतिनिधि सभा निर्वाचनमा नतिजामा ठूलो फेरबदल गर्दा नेकपा र एमालेलाई गाह्रो परेको हो । यो पटक २ ठाउँ जितेर साख जोगाएको कांग्रेसले २०७९ सालमा भएको निर्वाचनमा गण्डकीबाट १० सिट जितेको थियो । अहिले कांग्रेसले मनाङ र मुस्ताङबाहेक अन्य सबै क्षेत्रमा गुमाएको छ ।
त्यो बेला जितेका मनाङका योगेश गौचन थकाली र मनाङका टेकबहादुर गुरुङ यो पटक पनि दोहोरिएर जितेका हुन् । अहिले मतगणना भइरहेको गोरखा १ बाहेक पहिला कांग्रेसले जितेको क्षेत्रमा रास्वपाका उम्मेदवार निर्वाचित भएको छ । शशांक कोइरालाले जितेको नवलपुर १ मा यो पटक राजन गौतम आएका छन् । नवलपुरकै विष्णुकुमार कार्कीले जितेको २ नम्बर क्षेत्रमा मनिष खनाल विजयी भएका छन् । २०७९ को प्रतिनिधि सभा निर्वाचनमा अहिलेको राष्ट्रपति रामचन्द्र पौडेल निर्वाचित भएको तनहुँ १ मा उपनिर्वाचन मार्फत स्वर्णिम वाग्ले विजयी भएका थिए । सो क्षेत्रमा यो पटक पनि उनै वाग्ले निर्वाचित भएका छन् । नेपाली कांग्रेसबाट शंकर भण्डारीले जितेको तनहुँ २ मा यो पटक उनै भण्डारीलाई पराजित गर्दै रास्वपाका श्रीराम न्यौपाने विजयी भए ।
३ वर्ष अघि स्याङ्जा १ मा कांग्रेसका राजु थापा विजयी भएकोमा यो पटक रास्वपाका धनन्जय रेग्मी २ र धनराज गुरुङ निर्वाचित क्षेत्रमा झबिलाल डुम्रे प्रतिनिधि सभा जाने भएका छन् । खम्बीर गर्बुजाले जितेको म्याग्दीबाट स्वतन्त्र उम्मेदवारी दिएका महाविर पुन विजयी भए । गोरखाका राजेन्द्र बजगाईंले जितेको क्षेत्र १ मा रास्वपाका सुधन गुरुङसँग कांग्रेसका प्रेमकुमार खत्री पराजित भए ।
नेकपा एमालेले २०७९ मा जितेको ५ क्षेत्र यो पटक सबै गुमाएको हो । त्यो बेला पनि ५ दलीय गठबन्धन हुँदा पनि नेकपा एमालेबाट लमजुङमा पृथ्वीसुब्बा गुरुङ, पर्वतमा पदम गिरी, कास्की १ मनबहादुर गुरुङ, २ मा विद्या भट्टराई र ३ मा दमोदर पौडेल ‘बैरागी’ ले जितेका थिए । तर, एमालेले जितेको कास्कीको ३ वटै क्षेत्र, लमजुङ र पर्वत यो पटक रास्वपाले जितेको छ ।
रास्वपाबाट कास्की १ मा खड्गराज पौडेल, २ मा उत्तम पौडेल र ३ मा बिना गुरुङ विजयी भएकी छिन् । लमजुङबाट धर्मराज केसी र पर्वतबाट सागर भुसालले जितेका छन् । नेकपा अन्तर्गतको तत्कालीन माओवादी केन्द्रबाट देवेन्द्र पौडेलले जितेको बागलुङ २ यो पटक नेकपाले गुमाएको छ । यस क्षेत्रमा रास्वपाका सोम शर्मा निर्वाचित भए । गएको चुनावमा बागलुङकै क्षेत्र नम्बर १ मा कांग्रेससमेतको गठबन्धनमा जनमोर्चाका चित्रबहादुर केसी विजयी भएकामा यसपालि रास्वपाका सुशील खड्का विजयी भए । यसपटक चौथो स्थानमा समेटिएको जनमोर्चाको राजनीतिक भविष्य लगभग सकिएको छ । नेकपाका संयोजक पुष्पकमल दाहाल ‘प्रचण्ड’ले तत्कालीन माओवादी केन्द्रबाट जितेको गोरखा २ मा रास्वपाका कबिन्द्र बुर्लाकोटी विजयी भएका छन् ।
४ प्रदेशमा नील
फागुन २१ गते भएको प्रतिनिधि सभा निर्वाचनमा एमाले कांग्रेसको शर्मनाक हार भएको छ । प्रत्यक्षतर्फ १ सय ६५ मा निर्वाचन हुँदा नेकपा एमाले गण्डकी, मधेश, बागमती र लुम्बिनी प्रदेशमा निल भएको छ ।
यस्तै, नेपाली कम्युनिस्ट पार्टी नेकपा गण्डकी, कोशी, मधेश र सुदूरपश्चिम प्रदेशमा नील भएको छ । सात प्रदेशमध्ये रास्वपा ६ प्रदेशमा भारी सिटका साथ पहिलो भएको छ । कर्णालीमा कांग्रेस पहिलो भएको छ ।
