पाेखरा । यातायात व्यवस्था कार्यालय सवारी कास्कीले चैत महिनाभर बिहान ८ बजेदेखि नै सेवा प्रवाह गर्ने भएको छ ।
सवारी साधन नवीकरण र कर बुझाउने सेवाग्राहीको अत्यधिक चाप बढेपछि कार्यालयले बिहानैदेखि सेवा दिने निर्णय गरेको हो । सोमबार कार्यालयले सूचना जारी गर्दै चैत मसान्तसम्मका लागि यो व्यवस्था लागू गरिएको जानकारी दिएको छ ।
कार्यालयका अनुसार चैत महिनामा सवारी साधनको नवीकरण गर्न सेवाग्राहीको भीडभाड हुने गरेकाले कर संकलन र ब्लुबुक नवीकरण कार्यलाई सहज बनाउन समय बढाइएको हो । चैत महिनामा सेवाग्राहीको अत्यन्तै चाप र भीडभाड हुने गरेको हुँदा बिहान ८ बजेबाटै कार्यालय खुला रहनेछ’ भन्दै कार्यालय प्रमुख ढाकाप्रसाद शर्माले सेवाग्राहीको सहजताका लागि यस्तो निर्णय लिइएको बताए । यसअघि कार्यालय निर्धारित सरकारी समयमा मात्र खुल्ने गरेको थियो ।
यातायात कार्यालयले चैत मसान्तभित्रै कर बुझाउन समेत सबै सेवाग्राहीलाई आग्रह गरेको छ । चैत मसान्तपछि कर बुझाउँदा नियमानुसार थप जरिवाना लाग्ने भएकाले समयमै प्रक्रिया पूरा गर्न कार्यालयले ध्यानाकर्षण गराएको हो । बिहान ८ बजेदेखि नै कार्यालय खुल्ने भएपछि सेवाग्राहीले लामो समय लाइनमा बस्नुपर्ने बाध्यता कम हुने र सेवा छिटो हुने विश्वास कार्यालयले लिएको छ ।
