पोखरा ।
गण्डकी प्रदेशका मुख्यमन्त्री सुरेन्द्रराज पाण्डे ले मुलुकलाई आत्मनिर्भर र समृद्ध राष्ट्रका रूपमा स्थापित गर्नु नै गणतन्त्रको मुख्य दायित्व भएको बताएका छन् । गणतन्त्र दिवसको अवसरमा शुक्रबार शुभकामना सन्देश जारी गर्दै उनले स्वदेश तथा विदेशमा रहेका सम्पूर्ण नेपालीमा सुख, शान्ति र समृद्धिको शुभकामना व्यक्त गरे ।
नेपालमा संघीय शासन प्रणाली लागू भएको ८ वर्ष पूरा भइसकेको उल्लेख गर्दै उनले संघ, प्रदेश र स्थानीय तहबीचको सहकार्यबाट संघीयतालाई थप मजबुत बनाउने काम भइरहेको बताए । ‘नागरिकले प्रत्यक्ष अनुभूति गर्ने गरी प्रदेश सरकारले सुशासन र पारदर्शितालाई प्राथमिकतामा राख्दै काम गरिरहेको छ,’ मुख्यमन्त्री पाण्डेले उल्लेख गरेका छन् । जनताको अपेक्षा अनुरूप विकास र सेवा प्रवाहमा प्रदेश सरकार प्रतिबद्ध रहेको पनि उनले बताएका छन् ।
सकारात्मक सोच र सामूहिक प्रयासबाट मात्रै समस्याको दिगो समाधान सम्भव हुने मुख्यमन्त्री पाण्डेले बताएका छन् । गत भदौ २३ र २४ गते भएका ध्वंसात्मक घटनातर्फ संकेत गर्दै उनले यस्ता गतिविधिबाट तत्काल परिवर्तन सम्भव नहुने स्पष्ट पारे । विकास, स्थायित्व र आत्मविश्वासका साथ अघि बढ्नु नै अहिलेको आवश्यकता रहेको उनको भनाइ छ ।
गण्डकी प्रदेश सरकारले ‘आत्मनिर्भर र समुन्नत प्रदेश : सुखी प्रदेशवासी’ भन्ने लक्ष्यसहित काम गरिरहेको उल्लेख गर्दै उनले उक्त उद्देश्य पूरा गर्न राजनीतिक दल, नागरिक समाज, सञ्चारकर्मी तथा आम नागरिकको साथ र सहयोग आवश्यक रहेको बताए । शिक्षा, स्वास्थ्य, खाद्य सुरक्षा र स्वच्छ खानेपानीजस्ता आधारभूत अधिकारको प्रभावकारी कार्यान्वयनमा गणतन्त्र दिवसले थप प्रेरणा दिने विश्वास उनले व्यक्त गरे । साथै, यस ऐतिहासिक दिवसले राष्ट्रिय एकता, स्वाधीनता र सार्वभौमिकतालाई अझ सुदृढ बनाउन ऊर्जा मिल्ने पाण्डेको भनाइ छ ।मुलुकमा लोकतन्त्र स्थापना र संरक्षणका लागि जीवन उत्सर्ग गर्ने अमर सहिदहरूप्रति उनले श्रद्धाञ्जली व्यक्त गरे । विभिन्न आन्दोलनका क्रममा बेपत्ता भएका, घाइते तथा अपांगता भएका नागरिकहरूको योगदानको उच्च कदर गर्दै मुख्यमन्त्री पाण्डेले घाइतेहरूको शीघ्र स्वास्थ्यलाभको कामना पनि गरेका छन् ।
