काठमाडौँ । आईसीसी क्रिकेट विश्वकप लिग-२ अन्तर्गत नेपालले मंगलबार घरेलु टोली ओमानसँग खेल्दैछ। मस्कटमा हुने खेलमा जित निकाल्दै नेपाल अंकतालिकामा आफ्नो स्थिति बलियो बनाउने लक्ष्यमा हुनेछ।
नेपाल र ओमान दुवैले अघिल्लो खेलमा क्यानडालाई हराएका थिए। ओमानले शुक्रबार क्यानडालाई ४१ रनले पराजित गरेको थियो भने नेपालले आइतबार २१ रनको जित निकालेको थियो। रोहित पौडेलको शतकको मद्दतमा नेपालले क्यानडालाई हराएको थियो।
लिग–२ को अंकतालिकामा ओमान २९ खेलबाट ३३ अंकसहित चौथो स्थानमा छ। नेपाल भने ३३ खेलबाट २६ अंक जोड्दै छैटौँ स्थानमा छ। सातौँ स्थानको क्यानडाको ३४ खेलबाट २५ अंक छ।
ओमानलाई हराउन सके नेपालले क्यानडासँगको अंकदूरी तीन अंक पुर्याउनेछ। त्यसैले मंगलबारको खेल नेपालका लागि शीर्ष ६ मा आफ्नो स्थान बलियो बनाउने अवसर हो।
ओमानसँगको खेलपछि नेपालले लिग–२ मा थप दुई खेल खेल्न बाँकी रहनेछ। क्यानडाका पनि दुई खेल बाँकी छन्। आठौँ स्थानको यूएईले ३२ खेलबाट १९ अंक जोडेको छ। बाँकी तीन खेलमध्ये कम्तीमा एकमा जित निकाले नेपाललाई यूएईले अंकमा भेट्टाउन सक्ने छैन।
क्यानडामाथिको जितपछि उत्साहित नेपालले ओमानविरुद्ध पनि राम्रो प्रदर्शन गर्नुपर्नेछ। मंगलबारको नतिजाले नेपालको अंकतालिकाको स्थिति थप बलियो बनाउन महत्त्वपूर्ण भूमिका खेल्नेछ।
