पाकिस्तानमा तीन सवारीसाधन एकआपसमा ठोक्किँदा ८ जनाको मृत्यु, ३० जना घाइते

पाकिस्तानको दक्षिणी सिन्ध प्रान्तको जामशोरो जिल्लामा बुधवार तीनवटा सवारीसाधन एकआपसमा ठोक्किँदा कम्तीमा आठ जनाको मृत्यु हुनुका साथै ३० जना घाइते भएका उद्धार सेवाले जनाएको छ । दुर्घटना जिल्लाको मांझन्द क्षेत्र नजिकै सिन्धु राजमार्गमा बिहान सबेरै भएको थियो जब एक तेल ट्याङ्कर, एक ट्रक र एक यात्रु बस एकआपसमा ठोक्किँदा मृत्यु भएको थियो । सुरुमा तेल ट्याङ्कर र ट्रक एकआपसमा ठोक्किएपछि केही सेकेण्डमै बसले पछाडीबाट ठक्कर दिएको थियो । जसका कारण मृत्यु भएको हो । खबर पाएलगत्तै उद्धारकर्मी घटनास्थलमा पुगेर घाइतेहरुलाई नजिकैका विभिन्न अस्पतालमा लगिएको उद्धार सेवाले जनाएको छ । मृत्यु हुनेमा तेल ट्याङ्करका क्लिनर र चालक रहेका छन् । दुर्घटनाग्रस्त बस सिन्धको लारकाना सहरबाट प्रान्तीय राजधानी कराँचीतर्फ गइरहेको थियो ।