[adrotate banner= “3”]
प्रधानमन्त्री पुष्पकमल दाहालले नेपाल र भारतका बीचमा भएका विभिन्न सन्धि सम्झौताहरुलाई परिमार्जन गर्नेगरी अगाडी बढ्ने समझदारी भएको बताउनुभएको छ ।
मङ्गलवार प्रतिनिधि सभा बैठकमा आगामी आर्थिक वर्ष २०८१÷०८२ मा परराष्ट्र मन्त्रालयबाट विनियोजित बजेटको सम्बन्धमा उठेका प्रश्नका जवाफ दिँदै प्रधानमन्त्री दाहालले यस्तो बताउनुभएको हो । उहाँले नेपाल र भारतका प्रधानमन्त्रीबिच भएको भेटवार्तामा १९५० को सन्धि, शान्ति तथा मैत्री सन्धि लगायत विद्यमान द्विपक्षिय सन्धि सम्झौताहरुलाई परिमार्जन र अद्यावधिक गर्ने समझदारी भएको बताउनु भयो । यसको लागि सीमा सम्बन्धि विषयलाई स्थापित कुटनीतिक संयन्त्रहरुमार्फत समाधान गर्नेगरी अगाडी बढ्ने समझदारी भएको उहाँले जानकारी दिनुभयो । उहाँले आफ्नो पछिल्लो भारत भ्रमणको क्रममा पनि यो विषयमा भारतीय प्रधानमन्त्री नरेन्द्र मोदीसँग कुरा भएको र मोदीले सकारात्मक रुपमा लिनुभएको बताउनु भयो ।
उहाँले भन्नुभयो – ‘नेपाल सरकार नेपाल–भारतको सुगौली सन्धी १८१६ बमोजिम लिम्पियाधुरा, कालापानी र लिपुलेक लगायत महाकाली नदीको पूर्वका सबै भू–भाग नेपालको हो भन्ने कुरामा दृढ र स्पष्ट छ । भारत भ्रमणका अवसरमा नेपाल र भारतका प्रधानमन्त्रीबिच भएको भेटवार्तामा १९५० को सन्धि, शान्ति तथा मैत्री सन्धि लगायत विद्यमान द्विपक्षिय सन्धि लगायत सम्झौताहरुलाई परिमार्जन र अद्यावधिक गर्न एवम् सीमा सम्बन्धि विषयलाई स्थापित कुटनीतिक संयन्त्रहरुमार्फत् समाधान गर्नेगरी अगाडी बढ्ने समझदारी भएको छ । भर्खरै भएको मेरो भारत भ्रमणको क्रममा पनि सीमा लगायतका सबै विषयमा विद्यमान संयन्त्रहरुलाई क्रियाशील बनाई सकेसम्म छिटो यि समस्याको समाधान गर्न मैले आग्रह गरेको छु । र भारतीय प्रधानमन्त्रीले त्यसलाई सकारात्मक रुपमा सबै संयन्त्रलाई अगाडी बढाउने सहमती गर्नुभएको छ ।’
प्रधानमन्त्री दाहालले आगामी आर्थिक वर्षमा नेपाली दुतावास रियाद र क्यानबेरामा भवन निर्माणको काम शुरु गर्नेगरी बजेटको व्यवस्था गरिएको बताउनु भयो । त्यस्तै अन्य मुलुकमा रहेका जग्गामा समेत भवन निर्माण गर्न मन्त्रालयले प्राथमिकतामा राखेको बताउनु भयो । उहाँले रुसी सेनामा भर्ती भएका नेपालीलाई फिर्ता बोलाउनका लागि रुसी सरकारसँग कुरा भइरहेको बताउनु भयो । हमासको नियन्त्रणमा रहेका नेपाली विद्यार्थी विपिन जोशीको रिहाइका लागि इजरायल सरकार, कतार सरकार र इजिप्ट सरकारलाई सरकारले आग्रह गरेको र औपचारिक तथा अनौपचारिक बैठकमार्फत् पहल भइरहेको उहाँले जानकारी गराउनु भयो ।
[adrotate banner= “4”]
[adrotate banner= “5”]
[adrotate banner= “6”]
