[adrotate banner= “3”]
तीन खेलाडीले रातो कार्ड सामना गरेको खेलमा साविक विजेता भारतले सोमवार भूटानमाथि संघर्षपूर्ण जितसँगै साफ यु–२० च्याम्पियनसिपमा सुखद् शुरुवात गरेको छ ।
सातदोबाटोस्थित एन्फा मुख्यालय मैदानमा दुई खेलाडीबिना नै भारतले भूटानमाथि १–० को जित निकालेको हो । दोस्रो हाफमा विवाद हुँदा खेलका रेफ्री श्याम दनुवारले भारतका दुई र भूटानका एक खेलाडीलाई एकै पटक रातो कार्ड देखाएका हुन् । तुलनात्मक रूपमा कमजोर मानिएको भूटानले पनि भारतलाई चुनौती दियो । तर हार टार्न भने सकेन । समूह ‘बी’ को भारतले भूटानमाथि जितसँगै समूहविजेताका रूपमा दोस्रो चरणमा पुग्ने सम्भावना बलियो बनाएको छ । भारतले पहिलो हाफमा गरेको गोल नै तीन अंक दिलाउन पर्याप्त बन्यो । भारतले खेलको ३७ औं मिनेटमा नै अग्रता लिएको थियो ।
मोनिरुल मोल्लले हेडरमार्पmत गोल गर्दै अग्रता दिलाए । कर्नरबाट आएको बललाई उनको हेडर भुटानी गोलकिपर लोचो निमाले पत्तै पाएनन् । भुटानले पनि पहिलो हाफमा केही अवसर बनायो । कप्तान पेमा जाङ्पोले झन्डै मध्य भागबाट गरेको महत्वाकांक्षी प्रहार सफल भएन । त्यससँगै पहिलो हाफमा भारत १–० ले अगाडि रह्यो । ६९औं मिनेटमा खेल केही तनावपूर्ण रह्यो । भारतले फ्रिकिक लिने क्रममा दुई देशका खेलाडीबीच हात हालहाल भएपछि खेल रेफ्री दनुवारले कार्ड देखाएका हुन् ।
दनुवारले भारतका प्रम्भिर र भानलालपेका गुइटे तथा भुटानका किन्ले ग्याल्चेनलाई रातो कार्ड देखाए । गुइटले मैदान छिरेको ६ मिनेटभित्रै कार्ड बेहोरेका हुन् । यससँगै भारत ९ र भुटान १० खेलाडीका बीच खेल्यो । ७१औं मिनेटमा मोनिरुलले वान भर्सेस वानको अवस्थामा गोल गर्न सकेनन् । मध्य भागबाट ड्रिब्लिङ गर्दै अगाडि बढेका मोनिरुलको फितलो प्रहार भुटानी गोलकिपरले सहजै रोके । त्यसपछि दुवै तर्पm केही अवसर सिर्जना भएपनि गोल हुन सकेन । भारतले साँघुरो जित निकाल्यो ।
मंगलवार श्रीलंका र बंगलादेशबीच खेल हुनेछ । श्रीलंकाले पहिलो खेलमा आयोजक नेपालसँग १–० को हार सामना गरेको थियो । समूह ‘ए’ मा आयोजक नेपालसहित बंगलादेश र श्रीलंका छन् । अब नेपालले दोस्रो खेल अगस्ट २२ मा बंगलादेशसँग खेल्नेछ । अर्को समूहमा साबिक विजेता भारत, माल्दिभ्स र भूटान छन् ।
[adrotate banner= “4”]
[adrotate banner= “5”]
[adrotate banner= “6”]
