पाेखरा । प्रधानमन्त्री केपी शर्मा ओलीले कास्कीस्थित पोखरा स्वास्थ्य विज्ञान प्रतिष्ठानको प्राज्ञिक तथा आकस्मिक भवनको उद्घाटन गरेका छन् ।
प्रतिष्ठानको प्रथम दीक्षान्त समारोहमा सरिक हुन आज पोखरा आएका प्रधानमन्त्रीले १७ करोड रुपैयाँको लागतमा निर्माण भएकाे भवनको उद्घाटन गरेका हुन्।
उद्घाटनपछि उनले साे भवनको निरीक्षणसमेत पनि गरे । साे अवसरमा स्वास्थ्य तथा जनसंख्या मन्त्री प्रदीप पाैडेल पनि सहभागी थिए ।
प्रधानमन्त्री आजै पाेखरा आएका हुन् । प्रधानमन्त्रीलाई पोखरा अन्तर्राष्ट्रिय विमानस्थलमा गण्डकी प्रदेश प्रमुख डिल्लीराज भट्ट, मुख्यमन्त्री सुरेन्द्रराज पाण्डे, पूर्वमुख्यमन्त्री खगराज अधिकारी, पाेखरा महानगर प्रमुख धनराज आचार्यलगायत उच्चपदस्थ सरकारी अधिकारीहरुले स्वागत गरे ।
प्रधानमन्त्रीले मेडिकल विज्ञान संकाय पोस्टग्र्याजुएटका प्रथम र दोस्रो ब्याचका ४३ जना विद्यार्थीलाई दीक्षित गर्नेछन् । कार्यक्रम पोखरा नर्सिङ क्याम्पसको प्राङ्गणमा केही बेरामा शुरु हुनेछ ।
सो समारोहमा प्रतिष्ठान सभाका सदस्य, जनप्रतिनिधि, विभिन्न विश्वविद्यालयका पदाधिकारी, उच्च प्रशासक, विद्यार्थी, अभिभावक र अन्य विशिष्ट व्यक्तित्व सहभागी हुँदैछन् ।
प्रतिष्ठानले २०७६ फागुनबाट शैक्षिक कार्यक्रम सुरु गरेको हो । चिकित्सा शिक्षाका विभिन्न विधाका तेस्रो वर्षमा ३२, चौथो र पाँचौं वर्षमा ३०/३० जना रेजिडेन्ट चिकित्सक स्नातकोत्तर तहमा अध्ययनरत छन् ।
प्रतिष्ठानले बिएस्सी नर्सिङ र बिएनएसको पढाइ पनि थालेको छ । जसमा पहिलो र दोस्रो वर्षमा गरी एक सय २१ विद्यार्थी अध्ययनरत छन् ।
यसै वर्षदेखि प्रतिष्ठानमा एमबिबिएस कार्यक्रम सञ्चालनमा आएको छ । जसमा ५० सिट क्षमतामा ४६ विद्यार्थी भर्ना भएका छन् ।
