पोखरा । हाल देशमा पश्चिमी वायुको प्रभाव रहेको छ । जसको प्रभावले मुलुकका तराई र पहाडी भूभागमा हुस्सु तथा कुहिरो लागेको छ ।
यता, गण्डकी प्रदेशको राजधानी पोखराको मौसम सफा छ भने बिहानैदेखि घाम लागेको छ । जसले गर्दा चिसो कमी भएको महसूस गरिएको छ।
पोखरामा आज बिहान करिब ९ः१० बजेको तापक्रम १२ डिग्री सेल्सियस छ । आज पोखराको तापक्रम न्यूनतम् ८ डिग्री हुने र अधिकतम् २१ डिग्री सेल्सियस पुग्ने अनुमान गरिएको छ । लामो समयदेखि वर्षा नभएको पोखरामा अझै केही दिन वर्षा नहुने बताइन्छ ।
मौसम पूर्वानुमान महाशाखाका अनुसार आज बिहानको समयमा देशका तराई तथा उपत्यकाका केही स्थानमा हुस्सु तथा कुहिरो लागेकाले दैनिक जनजीवन, कृषि, स्वास्थ्य, यातायात तथा हवाई उडानमा असर पर्न सक्ने हुनाले आवश्यक सतर्कता अपनाउन आग्रह गरेको छ ।
महाशाखाका अनुसार हाल सुदूरपश्चिम प्रदेशमा आंशिकदेखि साधारणतया बदली रही बाँकी भूभागमा मौसम मुख्यतया सफा रहेको छ । साथै गण्डकी, कोशी, मधेस, बागमती र लुम्बिनी प्रदेशमा आज मौसम मुख्यतया सफा रहने छ ।
आज दिउँसो कर्णाली र सुदूरपश्चिम प्रदेशका हिमाली भूभागमा आंशिकदेखि साधारणतया बदली रहने सम्भावना रहने महाशाखाले जनाएको छ । पहाडी क्षेत्रमा आंशिकदेखि साधारणतया बदली रहने सम्भावना रहेको बताइन्छ ।
