पोखरा । आईसीसी यू-१९ महिला विश्वकप टी-२० क्रिकेट आजदेखि मलेसियामा शुरु भएको छ । पहिलो पटक विश्वकपमा पुगेको नेपाली महिला टिमले आज बंगलादेशसँग खेल्दैछ । नेपाल र बंगलादेशबीचको खेल केहीबेर अघि शुरु भएको छ ।
नेपालले टस हारेर व्याटिङमा उत्रिएको छ भने खराब प्रदर्शन गरेको छ । नेपालले सुरुआतमै दुई विकेट गुमाएको छ । सात ओभरको समाप्तिमा दुई विकेट बनाएर १५ रनमात्र बनाउन सकेको छ । सन् २००७ बाट अन्तर्राष्ट्रिय महिला क्रिकेट थालेको नेपालको यो पहिलो ठूलो सहभागीता हो ।
नेपालले बंगलादेशसँग एक पटकमात्र खेलेको छ । गत महिना मलेसियामा नै आयोजना भएको यू-१९ एसिया कपमा नेपाल बंगलादेशसँग ९ विकेटले पराजित भएको थियो ।
नेपालको समूहमा बंगलादेशसँगै अष्ट्रेलिया र स्कटल्याण्ड रहेका छन् । नेपालको लक्ष्य सुपर सिक्समा पुग्नु रहेको छ ।
त्यसका लागि नेपालले सुखद शुरुआत गर्नुपर्नेछ । नेपालले दोस्रो खेल माघ ७ गते स्कटल्यान्डसँग र तेस्रो खेल माघ ९ गते अस्ट्रेलियासँग खेल्नेछ । सबै खेल दिउँसो १२ः१५ बजे नै शुरु हुनेछन् ।
यो विश्वकपमा १६ राष्ट्र सहभागी छन् । चार समूहमा विभाजन गरी आपसमा खेलाई हरेक समूहका शीर्ष तीन टिम सुपर सिक्समा पुग्नेछन् ।
१६ बाट १२ मा झारिएपछि दुई समूह हुनेछ । पहिलो समूहमा पहिलो चरणको समूह ए र डीका शीर्ष तीन टिम हुनेछन् भने दोस्रो समूहमा समूह बी र सीका टिम रहने छन् ।
सुपर सिक्सका दुवै समूहका दुई टिम सेमिफाइनलमा पुग्नेछन् । एउटा समूहको शीर्ष टिमले दोस्रो समूहको दोस्रो टिमसँग सेमिफाइनल खेल्नेछ । फाइनल खेल आगामी २ फेब्रुअरीमा हुनेछ ।
