पोखरा । प्रवासी नेपाली मञ्च जापानले आन्तरिक प्रशिक्षण तथा खुला अन्तरक्रिया कार्यक्रम आयोजना गर्ने भएको छ । मञ्चका अध्यक्ष कुलचन्द्र खरेलका अनुसार कार्यक्रम जापानका मुख्य तीन शहरमा हुनेछ । कार्यक्रममा नेकपा एमालेका महासचिव शंकर पोखरेल सहभागी हुने बताइएको छ ।
जापानमा रहेका नेपालीसँग प्रवासको चुनौती र राज्यले गर्नुपर्ने सहयोगलगायतका विषयमा अन्तरक्रिया हुने अध्यक्ष खरेलले जानकारी दिए ।
कार्यक्रममा सहभागिताका लागि विभिन्न संघ-संस्थाका नेतृत्वकर्तालाई निमन्त्रणा गरिएको छ । कार्यक्रममा मञ्चका सदस्य तथा सल्लाहकारसमेत सहभागी हुने सचिव राजेन्द्र श्रेष्ठले बताए ।
मञ्चले १ फेव्रुअरीमा जापानको नागोया, २ फेव्रुअरीमा टोकियो र ९ फेव्रुअरीमा ओकिनावामा कार्यक्रम गर्ने भएको हो ।
नागोयामा बिहान ११ बजेबाट कार्यक्रम हुने नागोयाका क्षेत्रीय अध्यक्ष नरेश राईले जानकारी दिए । जापानबाट प्रतिनिधित्व गर्ने अन्तर्राष्ट्रिय कमिटी सदस्य, पूर्वी एशिया महादेशीय संयोजक, सदस्य, राष्ट्रिय कमिटी सल्लाहकार, चुवु क्षेत्रीय कमिटी नागोया, कान्साई क्षेत्रीय कमिटी ओसाका, क्यूस्यू क्षेत्रीय कमिटी फुकुओका सदस्य कार्यक्रममा सहभागी हुने अध्यक्ष राईले जानकारी दिए ।
यस्तै फेव्रुअरी २ मा टोकियोमा हुने कार्यक्रममा एमाले पोखरेल सहभागी हुनेछन् । आन्तरिक प्रशिक्षण कार्यक्रम बिहान १० देखि ३ बजेसम्म र त्यसपश्चात् जापानवासीसँग खुला अन्तरक्रिया हुने बताइन्छ ।
आन्तरिक प्रशिक्षणमा अन्तर्राष्ट्रिय कमिटी सदस्य, पूर्वी एशिया महादेशीय पदाधिकारी तथा सदस्य, राष्ट्रिय कमिटीका सल्लाहकार, विभागका सदस्य कान्तो क्षेत्रीय कमिटी, गुन्मा क्षेत्रीय कमिटी, तोहोकु क्षेत्रीय कमिटी सेन्दाईका सदस्य सहभागी हुने बताइएको छ ।
यसैगरी ओकिनावामा हुने कार्यक्रममा एमाले केन्द्रीय सदस्य डा. सूर्यप्रसाद पाठक सहभागी हुँदैछन् । कार्यक्रम फेव्रुवरी ९ तारिख दिउँसो १ देखि ५ बजेसम्म हुनेछ ।
कार्यक्रममा ओकिनावा क्षेत्रीय कमिटीका सदस्य, सल्लाहकार, विभागीय र मञ्च संवद्व सदस्यको प्रशिक्षण र त्यसपछि खुला हुनेछ । स्थानीय संघसंस्था, ओकिनावा निवासी नेपालीसँग खुला अन्तरक्रिया कार्यक्रम आयोजना गरिएको मञ्चका अन्तर्राष्ट्रिय कमिटी सदस्य तथा जापान इन्चार्ज सुरेश केसीले जानकारी दिए ।
