नवलपुर । नवलपुरको गैँडाकोटमा करेन्ट लागेर एक जनाको ज्यान गएको छ । मृत्यु हुनेमा जाजरकोटको भेरी नगरपालिका घर भई सीमा कन्स्ट्रक्सनमा कार्यरत ३३ वर्षीय आर्यनसिंह ठकुरी छन् ।
जिल्ला प्रहरी कार्यालय नवलपुरका अनुसार गैंडाकोट नगरपालिका वडा नं. ५ कालिकाचोकमा बिहीबार साँझ पुरानो पोलबाट नयाँ पोलमा तार सार्ने क्रममा उनलाई करेन्टले झड्का दिएको थियो । उनको विजुलीको पोलमै मृत्यु भएको थियो ।
स्थानीयले विद्युत प्राधिकरणकै गम्भीर लापर्वाहीका कारण घटना भएको दावी गरेका छन् । ‘विजुली बन्द गरेर तार सार्ने काम भइरहेका बेला करेन्ट कसरी लग्यो ?’ स्थानीयको प्रश्न छ ।
ठकुरीको शवलाई आवश्यक प्रक्रिया पूरा गरेर पोस्टमार्टमका लागि पठाइएको र घटनाबारे थप अनुसन्धान भइरहेको प्रहरीले जनाएकाे छ ।
