पोखरा । पोखरा महानगरपालिका वडा नं ९ नयाँबजारस्थित गण्डकी मेडिकल कलेज (जीएमसी) को अगाडिको सडकमा जेव्राक्रसिङ नहुँदा पैदलयात्रुलाई समस्या भएको छ । साथै जेब्राक्रसिङकै अभावमा दुर्घटनाको जोखिमसमेत छ ।
अस्पताल अगाडि औषधि पसलहरु छन् । अस्पतालबाट मागिएका औषधि किन्न दैनिक सैयौँ नागरिक सडक वारपार गर्नुपर्छ । नागरिकलाई जोखिम मोलेरै सडक पार गर्नुपर्ने अवस्था छ ।
केहीअघि त्यहाँ ५० मिटरको फरकमा जेव्राक्रसिङ थिए । सडकमा अस्फाल्ट प्रविधिबाट सडक पिच भएसँगै जेब्राक्रसिङ हटेको थियो । जेब्राक्रसिङ हटेको लामो समयसम्म पनि जेब्राक्रसिङमा कतैबाट ध्यान दिइएको पाइँदैन ।
जिल्ला ट्राफिक प्रहरी कार्यालय कास्कीले जेब्राक्रसिङ राख्ने विषयम पहल भइरहेको बताएको छ ।
प्रहरी वरिष्ठ नायव निरीक्षक शिवप्रसाद पाठकका अनुसार अस्पतालको अगाडि कम्तीमा एउटा जेब्राक्रसिङ राख्न पहल गरिसकेको र सडक विभागबाटै ढिलाई भएको हो ।
सडक डिभिजन कार्यालय पोखराका सूचना अधिकारी ई. ध्रुव पोखरेलले स्थानीयबाट पत्र आएमा जेब्राक्रसिङ राख्न कुनै कठिनाई नहुने बताए ।
यस विषयमा अब आफ्नो पनि ध्यानाकर्षण भएको ट्राफिक प्रहरीबाट निवेदन आएको भए आफूले बुझेर प्रक्रिया थाल्ने उनले जानकारी दिए ।
नेपाल पत्रकार महासंघ गण्डकी प्रदेशकी महासचिव जमुना शर्मा वर्षाले यस विषयलाई सामाजिक सञ्जालमार्फत उठान गरेकी छन् ।
‘कुनै बेला पोखरा नयाँबजारस्थित GMC हस्पिटलको अगाडि ५० मिटरको फरकमा दुईटा जेब्रा क्रसिङ थिए, त्यो विषयले निकै चर्चा पायो, सडक अस्फाल्टपछि लामो समय भयो अहिले एउटा पनि जेब्राक्रसिङ छैन, जसका कारण बिरामी, ज्येष्ठ नागरिक, अपांगता भएका व्यक्ति र सर्वसाधारणलाई बाटो काट्न निकै गाह्रो भइरहेको छ’, उनले सरोकारवालासँग आग्रह गर्दै लेखेकी छन्, ‘यो अत्यन्त गम्भीर विषय हो, जसले पैदल यात्रुको सुरक्षामा ठूलो चुनौती सिर्जना गरेको छ, सडक डिभिजन र ट्राफिक प्रहरीलाई आग्रह छ, यथाशक्य छिटो हस्पिटल अगाडि जेब्राक्रसिङ निर्माण गरी सर्वसाधारणको सुरक्षामा ध्यान देऊ ।’
