पोखरा । पोखरा महानगरपालिका वडा नं १२ स्थित पोखरा युनाइटेड एकेडेमीले एसईईमा सहभागी हुने विद्यार्थीलाई बिदाई गरेको छ ।
कक्षा ९ ले एक कार्यक्रम आयोजना गरी कक्षा १० उत्तीर्ण भई एसईईमा सहभागी हुने ३० विद्यार्थीलाई मायाको चिनो बिदाई गरेको हो ।
विद्यालयमा प्राचार्य बयान बहादुर गोदार, सहायक प्राचार्यद्वय देवेन्द्र अधिकारी र गोविन्द चापागाइँले एसईई परीक्षाका लागि बाँकी समयमा अत्यन्तै मेहनत गर्न र उत्कृष्ट नतिजासहित उत्तीर्ण हुन विद्यार्थीलाई शुभकामना दिए ।
प्राचार्य गोदारले भने, ‘एसईईलाई फलामे ढोका मानिन्छ, यसलाई चिर्न मेहनतको खाँचो हुन्छ, तपाईंहरुले अबका बाँकी समय कडा मेहनत गरेर आफू र विद्यालयको नाम चम्काउनुपर्छ ।’
उनले अध्ययनमा बढी ध्यान दिने र एसईई परीक्षालाई धेरै दवावका रुपमा नदिन पनि उनले विद्यार्थीलाई सुझाव दिए ।
प्राचार्य गोदारको अध्यक्षतामा भएको कार्यक्रममा कक्षा ९ की नारायणी नेपालीले स्वागत र अदीति श्रेष्ठले कार्यक्रम सञ्चालन गरेकी थिइन् ।
कार्यक्रममा कक्षा ९ का विद्यार्थीले विभिन्न सांस्कृतिक र सांगीतिक प्रस्तुति राखेका थिए ।
विद्यलयले गत माघमा पहिलो पटक ‘फुड फेस्टिभल एण्ड कन्सर्ट-२०८१’ आयोजना गरेको थियो ।
फुड फेस्टिभलमा विद्यार्थीले १५ प्रकारका अर्ग्यानिक खानाका परिकार प्रस्तुत गरेका थिए भने कमेडी च्याम्पियन सिजन-३ का विजेता सुनिल खड्का, उत्कृष्ट प्रतिस्पर्धी कर्मसिंह लामा, निश्चल अर्याल, सन्देश देवकोटा, प्रतीक अधिकारीलगायतको कमेडी प्रस्तुति राखेका थिए ।
२०५० सालमा स्थापित विद्यालयमा हाल आठ सय ५० विद्यार्थी रहेकामा कक्षा ११ र १२ मा मात्रै दुई सय २० विद्यार्थी छन् । विद्यालयका कक्षा ११ र १२ मा विज्ञान, व्यवस्थापन र होटल व्यवस्थापनको पढाई हुँदै आइरहेको छ ।
विद्यालयका अनुसार आगामी दिनमा मोवाइल, टीभी र अन्तर्राष्ट्रिय भाषासँग सम्बन्धित कक्षा सञ्चालनको तयारी गरिएको छ ।
