पोखरा । कास्कीको मादी गाउँपालिका वडा नं ८ सोंथर बेँसी (सुन्दर बेँसी) मा सोंथर बेँसी टारी बजार मेला शुरु भएको छ ।
मेलामा आयोजित गोरु जुधाई प्रतियोगिता निकै रोचक बन्यो । प्रतियोगितामा १६ गोरुबीच प्रतिस्पर्धा गराइएकोमा स्थानीय पदमबहादुर विकको गोरु प्रथम, भूमलाल अधिकारीको गोरु द्वितीय भयो । प्रथम हुनेले आठ र द्वितीय हुनेले छ हजार रुपैयाँ नगद पुरस्कार प्राप्त गर्यो ।
मेलामा नागीधारको घाटु नाच प्रस्तुत गरिएको थियो भने खुला फाइभ ए साइड फुटबल प्रतियोगिता जारी छ । जसमा बिहीबार सात खेल सम्पन्न भएका छन् ।
मेलामा गोरु प्रदर्शन एवं किनबेच साटासाट, खसी बोका बाख्रा, मह, घ्यू, आलु, तरकारी, माछालगायत कृषि वस्तु तथा पशुको प्रदर्शन तथा किनबेच मेत भएको मेलाका सहसंयोजक नन्दलाल अधिकारीले जानकारी दिए ।
साथै मेलामा खुला पुरुष छेलो फाल्ने, खुला पुरुष तथा महिला रस्सी तान्ने खेल पनि रहेका छन् ।
यस्तै सांस्कृतिक कार्यक्रमतर्फ ३० बर्ष भन्दा माथि उमेर समूह र ३० बर्ष भन्दा कम उमेर समूहको छुट्टाछुट्टै खुला सामूहिक नृत्य प्रतियोगिता, स्थानीय गाउँको आमा समूह नाँच, युवा क्लबको ठेटार नाँच, घाँटु नाँच, कृष्ण चरित्र नाँच, स्थानीय दोहोरी तथा गायक गायिकाको गायन र भजनलगायत प्रस्तुति रहेका छन् ।
शैक्षिक कार्यक्रमतर्फ कक्षा १ देखि ३ सम्मका विद्यार्थीका लागि खुला श्रुतिलेखन प्रतियोगिता, कक्षा ४ देखि ८ सम्मका विद्यार्थीका लागि सोंथर बेँसी परिसरमा कृषि पर्यटन प्रवर्द्धनको सम्भावना शीर्षकमा वक्तृत्वकला प्रतियोगिता राखिएको सोंथर बेंसी विकास समिति द्वितीय उपाध्यक्ष दीर्घमान गुरुङले जानकारी दिए । मेला आजै समापन हुँदैछ ।
