पोखरा । पोखरा महानगरपालिका वडा नं १२ भद्रकालीस्थित पोखरा युनाइटेड एकेडेमी सेकेण्डरी स्कुलको वार्षिक सांस्कृतिक भेला तथा पुरस्कार वितरण कार्यक्रम विद्यालय प्रांगणमा जारी छ ।
कार्यक्रमको उद्घाटन पोखरा महानगरपालिका वडा नं १२ का वडाध्यक्ष सन्तोष बास्तोलाले गरेका थिए ।
कार्यक्रममा वडाध्यक्ष सन्तोष बास्तोलाले देशमा व्यवहारिक शिक्षा अपरिहार्य भएका बताए । उनले व्यवहारिक शिक्षा दिन नसकिए बेरोजगारको संख्या घट्न नसक्ने स्पष्ट पारे । बुद्धको देश नेपाल बुद्धि भएको देशको रुपमा पनि परिचित गराउनुपर्नेमा उनले जोड दिए ।
उनीहरुले युवाइटेडको आँगनमा स्वागतम् बोलको गीतले स्वागत गरेका थिए । साथै कक्षा ५ का विद्यार्थीले स्वागत गीत र नृत्यमार्फत कार्यक्रममा सहभागीलाई स्वागत गरेका थिए । यस्तै विद्यार्थीले स्वस्ती वाचनसमेत गरेका थिए ।
विद्यालय व्यवस्थापन समिति अध्यक्ष शिवबहादुर भण्डारीको अध्यक्षतामा भएको कार्यक्रममा विद्यालयका सहायक प्राचार्य देवेन्द्र अधिकारीले स्वागत मन्तव्य राखेका थिए । सो क्रममा उनले विद्यालयको समग्र गतिविधिमाथि प्रकाश पारेका थिए ।
