पोखरा । सराङकोटमा जारी श्रीमद्भागवत् ज्ञानमहायज्ञ एवं धार्मिक पर्यटन महाउत्सवअन्तर्गत पाँचौं दिन आइतबारसम्म कुल एक करोड १३ लाख बढी दान संकलन भएको छ । आइतबारमात्रै २० लाख बढी दान संकलन भएको महायज्ञका कोषाध्यक्ष शिव कोइरालाले जानकारी दिए ।
आइतबार सराङकोट जैसीथोक निवासी उमनाथ चपाई परिवारबाट तीन लाख २२ हजार दुई सय २२, पोखरा-१८ निवासी पूर्णप्रसाद तिमिल्सिनाको परिवारबाट तीन लाख २२ हजार दुई सय २२, पालिखेचोक निवासी वीरेन्द्रमान पालिखे परिवारबाट दुई लाख ३३ हजार तीन सय ३३, जन्मदिनको अवसरमा महायज्ञका कोषाध्यक्ष शिव कोइराला परिवारबाट ७५ हजार, गोठादीका कर्णबहादुर थापा परिवारबाट ५० हजार एक सय एवं अन्य दाताको समेत गरी २० लाख रुपैयाँ बढी दान संकलन भएको कोषाध्यक्ष कोइरालाले बताए ।
महायज्ञ मध्यतिर आइरहँदा भक्तजनको सहभागिता पनि बढ्दै गएकोे छ । सुरुमा झरीका कारण केही प्रभावित सो यज्ञमा मौसममा क्रमिक सुधार आएसँगै जनसहभागिता बढ्दै गएको हो । आजसम्म करिब ६० हजार दर्शकले सहभागिता जनाएको प्रचारप्रसार संयोजक कृष्ण थापाले जानकारी दिए ।
अन्नपूर्ण केवलकारमार्फत आजसम्म १२ हजार, निःशुल्क बस सेवामार्फत २० हजार तथा निजी सवारी साधन प्रयोग गरी त्यतिमा मात्रामा भक्तजन सराङकोट धाम पुगेको उनको भनाइ छ ।
महायज्ञमा दाताको सहभागिता बढ्दै गइरहेको अध्यक्ष प्रेमबहादुर जिसीले बताए । पक्कै पनि सराङकोट महाउत्सव सफलता उन्मुख छ ।
सराङकोटमा जारी महायज्ञ शनिबार राष्ट्रपति रामचन्द्र पौडेलले उद्घाटन गरेका थिए ।
सराङकोटमा २०६१ सालदेखि गुरुयोजना बनाई विभिन्न संरचना निर्माण गरिएको छ । हालसम्म विशाल शिव मन्दिर, नेपालकै पहिलो विशाल पञ्चमुखी गणेश मूर्ति, १०८ शिवलिङ्ग, १०८ धारा, भ्यू टावर, बहुउद्देश्यीय भवन, भूमे कालिका, स्वागतद्वार निर्माण भएका छन् । ती संरचना निर्माणमा हालसम्म ३५ करोड बढी खर्च भइसकेको छ । सराङकोटमा अझै १५ करोडका संरचना निर्माण गर्ने समितिले लक्ष्य राखेको छ ।
महाउत्सवमा सामुहिक ब्रतबन्ध, लाख बत्ती बाल्ने, ग्रह शान्ति, रुद्री, चौरासी पूजा तथा संगीतमय भजन कीर्तन भइरहेको छ भने भागवत् भाष्कर पण्डित कमलनयन गौतमले कथा प्रवचन गरिरहेका छन् ।
