पोखरा । पूर्वराजा ज्ञानेन्द्र शाहले बागलुङ कालिका भगवती मन्दिरमा पूजा-अर्चना गरेका छन् । माघ २७ गतेदेखि पोखरामा रहेका शाह आज बागलुङ पुगेका थिए ।
बागलुङमा उनको भव्य स्वागत गरिएको नागरिक स्वागत मूल समारोह समिति सचिवालय संयोजक एवं राप्रपाका केन्द्रीय सदस्य अरुण गिरीले जानकारी दिए ।
गिरीका अनुसार पूर्वराजा शाह बागलुङ पुग्दा राप्रपाका नेता, कार्यकर्ता, सर्वसाधारण, शुभेच्छुक तथा समर्थकले स्वागत गरेका थिए ।
शाहका समर्थकले ‘राजा आऊ देश बचाऔँ’, ‘हाम्रो राज प्राणभन्दा प्यारो छ’, ‘हिन्दू राज्य कायम होस्’, लगायतका नारा घन्काएका थिए ।
उक्त अवसरमा शाहले आफ्ना शुभेच्छुकसँग संवादसमेत गरेका थिए । उनको धार्मिक स्वागतका लागि विश्व हिन्दू महासंघ बागलुङ अध्यक्ष जब्बरबहादुर लामिछानेको नेतृत्वमा पाँच सय एक सदस्यीय नागरिक स्वागत मूल समारोह समिति समेत गठन गरिएको थियो ।
पोखरा बसाइका क्रममा शाह फागुन १९ गते सोमबार विन्ध्यवासिनी मन्दिरको दर्शन गरेका थिए । पोखराको गणेशटोदेखि नै यात्रा गरेका शाहलाई हजारौँ नागरिकले स्वागत गरेका थिए ।
यसअघि उनी स्याङ्जा पुगेर शाहबंशीय कुल मन्दिर आलमदेवीमा पूजा गरेका थिए । साथै उनले यस बीचमा पोखराको प्रशिद्ध केदारेश्वर महादेवमणि मन्दिर दर्शन, पोखराको रामबजारस्थित राजा वीरेन्द्रशको शालिक अनावरणसमेत गरेका थिए । उनी पोखराको तालबाराही मन्दिरको महाआरतीमा समेत सहभागी भएका थिए ।
