पोखरा । नेपाल सरकार, भारतीय दूतावास र विभिन्न नौ स्थानीय तहबीच प्रभावयुक्त सामुदायिक विकास आयोजनासम्बन्धी सम्झौतामा हस्ताक्षर भएको छ ।
मंगलबार सिंहदरबारमा एक समारोहकाबीच संघीय मामिला तथा सामान्य प्रशासन मन्त्रालय, भारतीय दूतावास र नाै स्थानीय तहबीच शिक्षा र स्वास्थ्य क्षेत्रमा सहयोग गर्ने सम्झौतामा त्रिपक्षीय सम्झौता भएको हो ।
सम्झौताअनुसार भारत सरकारले नौ वटा स्थानीय तहमा विद्यालयका संरचना तथा स्वास्थ्य चौकी निर्माण गर्नका लागि आर्थिक सहायता प्रदान गर्ने संघीय मामिला तथा सामान्य प्रशासन मन्त्रालयका सहसचिव एवं प्रवक्ता कालीप्रसाद पराजुलीले जानकारी दिए ।
पराजुलीकाअनुसार सम्झौता भएका स्थानीय तहहरुमा धनगढी उपमहानगरपालिका, कैलाली, धुर्कोट गाउँपालिका, गुल्मी, चंखेली गाउँपालिका, हुम्ला, बुटवल उपमहानगरपालिका, रुपन्देही, ईन्द्रवती गाउँपालिका, सिन्धुपाल्चोक, जयपृथ्वी नगरपालिका, बझाङ, मिखुवाखोला गाउँपालिका, ताप्लेजुङ, भरतपुर महानगरपालिका, चितवन, लिखुपिके गाउँपालिका, सोलुखुम्बु छन् ।
उनले सम्झौता कार्यान्वयन हुने प्रत्येक आयोजनाको अधिकतम बजेट सिमा २० करोड रुपैयाँ रहने बताए ।
उनले भने, ‘यो नेपाल-भारत सरकारबीच द्विपक्षीय सहयोग कार्यक्रमअन्तर्गत भारत सरकारले नेपालको शिक्षा र स्वास्थ्यको क्षेत्रमा सहयोग पुर्याउँदै आइराखेको छ, आज हामीले नाै वटा जिल्लाको नाै वटा पालिकामा विभिन्न क्षेत्रमा सहयोग पुर्याउने उद्देश्यले सम्झौता भएको छ, अहिले यी नाैवटा स्थानीय तहको लागि सहयोग उपलब्ध गराएको हो, योभन्दा अगाडि पनि भारत सरकारबाट विभिन्न १३ वटा परियोजनामा यो आर्थिक वर्षमा सम्झौता भइसकेको छ, यसका लागि अब हामी सम्बन्धित पालिकाबाट आयोजनाहरु माग्छौं, आयोजनाको विस्तृत परियोजना प्रस्ताव गरेर हामीले अर्थ मन्त्रालयमार्फत भारतीय दूतावासमा पठाउँछौं, दूतावासले स्वीकृत गरिसकेपछि परियोजना लागू हुन्छ, यो निरन्तर सहयाेग हुने कार्यक्रम हो ।’
आयोजनाअन्तर्गत स्थानीय तहहरुले आयोजना छनोट गरी मन्त्रालयमा बुझाउने र अर्थ सम्झौतामा स्थानीय तह तथा अन्य सरकारी निकायबाट प्राप्त माग संघीय मामिला तथा सामान्य प्रशासन मन्त्रालयले परीक्षण गरी अर्थ मन्त्रालयमा आयोजना सिफारिस गर्ने र अर्थले प्राथमिकताको आधारमा सहायता परिचालनका लागि भारत सरकारलाई अनुरोध गर्ने गरी प्रक्रिया निर्धारण गरिएको उनको भनाइ छ ।
