राष्ट्रिय सभा सदस्य डा. अञ्जान शाक्य र प्रतिनिधि सभा सदस्य एवं राष्ट्रिय स्वतन्त्र पार्टीकी सांसद सोविता गौतमले जलवायु परिवर्तनको विषयमा संघीय संसदका दुवै सदनका सांसदहरु सम्मिलित फोरम बनाउनुपर्नेमा जोड दिनुभएको छ ।
हालैमात्र शाक्य अन्तरव्यवस्थापिका संघ (आइपियु) को दिगो विकास स्थायी एशिया—प्रशान्त क्षेत्रबाट विजयी हुनुभएको छ भने गौतम पनि १५० औं अन्तरसंसदीय संघ (इन्टर पार्लियामेन्ट्री युनियन आईपीयू) महासभामा गठन गरिएको स्वास्थ्यसम्बन्धी समितिमा निर्वाचित हुनुभएको छ । मंगलवार सिंहदरबारमा आयोजित अन्तरव्यवस्थापिका संघ (आईपीयु) को १५० औं महासभाबाट नेतृत्व लिनुभएका डा. अञ्जान शाक्य र सोविता गौतमको स्वागत, सम्मान तथा संसदीय मामिला पत्रकारसँगको अनुभव आदानप्रदान कार्यक्रममा बोल्दै दुवै सांसदहरुले जलवायु परिवर्तनका लागि संयुक्त फोरम निर्माण गर्नुपर्ने बताउनुभएको हो । कार्यक्रममा बोल्दै राष्ट्रिय सभा सदस्य शाक्यले जलवायु परिवर्तनको मुद्दा हेर्नका लागि पनि राष्ट्रिय सभा र प्रतिनिधि सभा र प्रदेश सभाका सांसदहरु समेत अट्ने गरी संयुक्त समिति बनाउनुपर्नेमा जोड दिनुभयो । देश निर्माणका लागि बजेट निर्माण सम्बन्धी संयुक्त कमिटी बनाउनुपर्ने बताउनु भयो । उहाँले अन्तर्राष्ट्रिय फोरमहरुसँग सम्बन्धित विभिन्न समितिमा नेपालको उपस्थिति कमजोर रहेको भन्दै अब नेपालले सहभागिता बढाउने गरी अघि बढ्न जरुरी रहेको उल्लेख गर्नुभयो । त्यसको लागि आन्तरिक तयारीलाई पनि त्यत्तिकै जोड दिन आवश्यक रहेको उहाँको भनाइ छ ।
उहाँले भन्नुभयो, ‘हामीले अब ३ वटा कमिटी बनाउनुपर्छ की जस्तो लागेको छ । संयुक्त रुपमा प्रतिनिधि सभा, राष्ट्रिय सभामा । संयुक्त कमिटी जस्तो बजेट निर्माणमा । देश निर्माणमा कसरी हामी अघि बढ्न सकिन्छ ? भन्दा सबै सांसदहरुको स्वामित्व रहने गरीकन । अर्को भनेको क्लाइमेट चेन्जमा पनि आवश्यक रहेको छ । जसमा राष्ट्रिय सभा र प्रतिनिधि सभाका साथै प्रदेश सभाका सांसदहरु पनि कसरी अटाउन सकिन्छ भन्नेकुरा हो । हाम्रो इन्टरनेशन रिजलेशनमा हामीले पनि अब ध्यान दिनुपर्ने आवश्यकता महशुस भएको छ । जस्तो सस्टेनेबल डेभलपमेण्टमा छ, सेक्युरिटमा छ । हेल्थमा छ । यसमा नेपालको सहभागिता अलि कम भएको देखिएको छ । यसका लागि हामीले आन्तरिक तयारी गर्नुपर्छ ।
कार्यक्रममा बोल्दै राष्ट्रिय स्वतन्त्र पार्टीकी सांसद गौतमले जलवायु परिवर्तनको मुद्दा हेर्नका लागि राष्ट्रिय सभा र प्रतिनिधि सभाका सांसदहरु सहभागी संयुक्त फोरम बनाउनुपर्ने आवश्यकता औंल्याउनु भयो । जलवायु परिवर्तनका मुद्दाहरु राष्ट्रिय सभा अन्तर्गतका दिगो विकास लगायतका समितिहरुमा छलफल हुने गरेको भएपनि संसदमा पनि छुट्टै कमिटी बनाउन जरुरी देखिएको उल्लेख गर्नुभयो । जलवायु परिवर्तनको मुद्दा नेपालका लागि महत्वपूर्ण विषय रहेकाले फोरम बनाएर अघि बढ्दा कतिपय समस्या समाधान हुनेमा जोड दिनुभयो ।
उहाँले भन्नुभयो, ‘सम्माननीय सभामुखज्युले त्यहाँको महासभालाई सम्बोधन गर्ने क्रममा पनि क्लाइमेट इस्युमा बढी महत्व दिएर विषय राख्नुभयो । हामी संसारभरका जुनसुकै फोरममा जाँदा पनि क्लाइमेट इस्युलाई बढी महत्व दिएर कुरा गरेका छौँ । अबदेखि सम्माननीयज्युसँग पनि मेरो अनुरोध छ । हामीले क्लाइमेटका लागि छुट्टै अन्तर्राष्ट्रिय फोरमहरुमा जहाँ पनि गएर क्लाइमेटका विषयहरु हामी गर्छौं । तर हामीले हाम्रै पाल्र्यामेण्टमा ट्याक्कै डेडिकेटेड कमिटी छैन । आफ्नै समितिमा दिगो विकासमा केही कुरा गरिरहेका हुन्छौँ । राष्ट्रिय सभामा कुनै समितिमा केही कुरा गरेको होला । उर्जामा, वनमा भइरहेको होला । धेरै ठाउँमा छुट्टाछुट्टै तवरले भइरहेको छ । तर क्लाइमेट नेपालको महत्वपूर्ण विषय र सेन्टरमा भएको विषय भएकाले कसरी निर्माण गर्ने हो, तर राष्ट्रिय सभा र प्रतिनिधि सभाका सदस्यहरुको एउटा चासो भएका सांसदहरुको एउटा फोरम बनाउँदा उपयुक्त हुन्छ । त्यसले गर्दा कहाँ के भइरहेको छ ? कहाँ भाग लिइरहेका छौँ, त्यो पनि संसदलाई जानकारी हुन्छ ।’
सांसदहरुले आइपियुमा भाग लिन हरेक ६ महिनामा जानुपर्ने भएकाले नयाँ टिमलाई भाग लिइसकेका सांसदहरुले जानकारी गराउनुपर्ने आवश्यकता देखिएको उल्लेख गर्नुभयो ।
