पोखरा, ११ वैशाख २०८२
चर्चित सामाजिक अभियन्ता तथा पत्रकार अर्जुन भुसालले पोखरामा जारी गण्डकी कोटीहोम महायज्ञमा सहभागी हुँदै धर्म र संस्कृतिको संरक्षणले मात्र मुलुकको अस्तित्व जोगिने बताएका छन्। उनले देशमा पछिल्लो समय धर्म र संस्कृति लोप हुँदै गएको भन्दै यसको संरक्षण र सम्वद्र्धनमा सबै नेपालीको साझा दायित्व रहेको जोड दिए।
गण्डकी कोटीहोमको अवसरमा आयोजित कार्यक्रममा बोल्दै भुसालले भने, “हाम्रो धर्म र संस्कृति हाम्रो पहिचानको आधार हो। यसलाई जोगाउन नसके हामीले हाम्रो इतिहास र मूल्य–मान्यता गुमाउनेछौँ।” उनले युवा पुस्तालाई धर्म र संस्कृतिप्रति जागरूक बनाउनुपर्नेमा विशेष जोड दिए।
भुसालले समाजमा बढ्दो पाश्चात्य प्रभाव र आधुनिकताको नाममा संस्कृति मासिन लागेकोप्रति चिन्ता व्यक्त गर्दै यस्ता धार्मिक एवम् सांस्कृतिक कार्यक्रमले समाजमा सकारात्मक सन्देश प्रवाह गर्ने विश्वास व्यक्त गरे। “गण्डकी कोटीहोम जस्ता कार्यक्रमले हाम्रो धार्मिक र सांस्कृतिक मूल्यलाई पुनर्जागरण गर्ने अवसर प्रदान गर्छ,” उनले थपे।
कार्यक्रममा सहभागी अन्य वक्ताहरूले पनि भुसालको भनाइलाई समर्थन गर्दै धर्म र संस्कृतिको संरक्षणमा सामुदायिक सहभागिताको आवश्यकता औँल्याए। गण्डकी कोटीहोम महायज्ञले स्थानीय समुदायमा धार्मिक जागरण ल्याउनुका साथै सामाजिक एकता र सद्भावलाई पनि प्रवद्र्धन गरेको सहभागीहरूको भनाइ थियो।
