पोखरा । न्युजील्यान्डका उपप्रधान तथा विदेशमन्त्री विन्सटन पिटर्स नेपाल औपचारिक भ्रमणमा आउने भएका छन् ।
नेपालको परराष्ट्र मन्त्रालयका अनुसार पिटर्स यही जेठ १५ गते नेपाल आउन लागेका हुन् ।
पिटर्सले नेपालका राष्ट्रपति रामचन्द्र पौडेल, प्रधानमन्त्री केपी शर्मा ओलीसँग शिष्टाचार तथा परराष्ट्रमन्त्री डा. अरुजु राणा देउवासँग द्विपक्षीय भेटवार्ता गर्ने कार्यक्रम छ ।
न्युजील्यान्डबाट नेपालमा पहिलो पटक औपचारिक उच्च स्तरीय भ्रमण हुन लागेको हो । पिटर्सको यो भ्रमणले दुई देशबीचको सम्बन्धमा नयाँ आयाम थप्ने विश्वास गरिएको छ ।
पिटर्सले अष्ट्रेलिया, श्रीलंका, नेपाल र भारतको भ्रमण गर्ने बताइएको छ । दक्षिण एसियाली देशसँगको सम्बन्ध सुदृढ गर्ने उद्देश्यका साथ पिटर्सको भ्रमण हुन लागेको हो ।
