पोखरा । आज राति गण्डकी र लुम्बिनी प्रदेशका केही स्थानमा भारी वर्षा हुने भएको छ ।
नेपालमा हाल पश्चिमी तथा स्थानीय वायुका साथै बङ्गालको खाडीबाट आएको जलवाष्पयुक्त हावाको आंशिक प्रभाव रहेकोकाले गण्डकी र लुम्विनी प्रदेशका केही भूभागमा भारी वर्षा हुने अनुमान गरिएको जल तथा मौसमको पूर्वानुमान महाशाखाले जनाएको छ ।
आज दिउँसो देशभर आंशिकदेखि साधारणतया बदली रहने बताइन्छ । विशेषगरी गण्डकी, कोशी, बागमतीर लुम्बिनी प्रदेशलगायत पहाडी भागका केही स्थानमा मेघगर्जन र चट्याङसहित हल्कादेखि मध्यम वर्षाको सम्भावना छ ।
यस्तै, उच्च पहाडी तथा हिमाली भागका एकदुई स्थानमा हल्का वर्षा र हिमपातको सम्भावना रहेको महाशाखाले जनाएको छ ।
आज राति गण्डकी र लुम्बिनी प्रदेशलगायत देशका पहाडी भागमा आंशिकदेखि साधारणतया बदली रही बाँकी भागमा मौसम सफा रहनेछ ।
गण्डकी र लुम्बिनी प्रदेशलगायत पहाडी केही स्थानमा मेघगर्जन र चट्याङसहित हल्कादेखि मध्यम वर्षाको सम्भावना कायमै छ । उच्च पहाडी तथा हिमाली भागका एकदुई स्थानमा हल्का वर्षा र हिमपात हुन सक्ने बताइन्छ ।
साथै, गण्डकी, कोशी र बागमती प्रदेशका उच्च पहाडी तथा हिमाली भागका एकदुई स्थानमा हल्का वर्षा र हिमपातको सम्भावना पनि छ ।
पोखरामा आज बिहानै प्रचण्ड गर्मी महसुस गरिएको छ । बिहान ९ बजे पोखराको तापक्रम २७ डिग्री सेल्सियस रहेकामा आज दिउँसो २७ देखि ३१ डिग्री सेल्सियसबीच रहने अनुमान गरिएको छ ।
पोखराको सापेक्षित आद्रता ७३ प्रतिशत रहेको र आज दिनभर आंशिक बादल लाग्ने बताइन्छ ।
