पोखरा । तनहुँको बन्दीपुर गाउँपालिका वडा नं. ३ स्थित खुदीखोलाको तानेको रहमा एक जनाको शव भेटिएको छ । उक्त शव बन्दीपुर-३ सेराटारका ५६ वर्षीय मंगले नेपालीको भएको पुष्टि भएको प्रहरीले जनाएको छ ।
जिल्ला प्रहरी कार्यालय तनहुँका अनुसार मंगले जेठ ३१ गते साँझदेखि सम्पर्क विहीन भएका थिए । प्रहरी, आफन्तजन र स्थानीयले खोजी गर्ने क्रममा आज बिहान खोलामा उनको शव भेटिएको हो ।
शव भेटिएको खबर पाउने वित्तिकै इलाका प्रहरी कार्यालय बन्दीपुरबाट प्रहरी निरीक्षक तिलकबहादुर बमको नेतृत्वमा खटिएको प्रहरी टोली घटनास्थल पुगेर शवको जाँच मुचुल्कासमेतको प्रारम्भिक अनुसन्धान सम्पन्न गरी शव परीक्षण पश्चात् आफन्तको जिम्मा लगाएको प्रहरीले जनाएको छ ।
