पोखरा । पोखरा महानगरपालिका वडा नं २५ मा आयोजित पाचौं हेमजा हिले महोत्सवको तयारी पूरा भएको छ । देवीस्थान सेवा समाज हेमजाले महोत्सव आयोजना गरेको हो ।
महोत्सवअन्तर्गत हिले दौड, रस्साकस्सी, घैंटो फुटाउने, कृषि झाँकी प्रदर्शन, विद्यालय स्तरीय धान रोपाईं प्रतियोगिता, उत्कृष्ट किसान सम्मान, हलगोरु तथा जोडी दौड, आमा समूह बीच असारे भाका, हिलोमा भाले तथा माछा समाउनेलगायतका प्रतियोगिता हुँदैछन् ।
समाजका अध्यक्ष कृष्णमान श्रेष्ठका अनुसार महोत्सवको तयारी स्वरुप महोत्सव स्थल वरपर सरसफाई गरिसकिएको छ ।
हेमजालाई कृषि पर्यटनसँग जोड्न विष्णुपादुका धार्मिक क्षेत्रको प्रवद्र्धन गर्न, आन्तरिक र बाह्य पर्यटनको आगमन बढाउन, हेमजाका कृषकको सम्मान र युवालाई कृषिमा प्रोत्साहनका गर्नका लागि हेमजा हिले महोत्सवलाई निरन्तरता दिइएको अध्यक्ष श्रेष्ठले जानकारी दिए ।
महोत्सवले कृषि क्षेत्रका लागि महत्वपूर्ण हुने अपेक्षा गरिएको सामाजकी उपाध्यक्ष एवं महोत्सव मूल आयोजक समिति संयोजक चन्द्रकला पोख्रेलले बताइन् ।
‘कृषिमा कृषकलाई प्रोत्साहन, विष्णुपादुका मन्दिर हेमजाको शान’ नाराका साथ स्थानीय देवीस्थान टोलमा महोत्सव हुँदैछ, जसमा विभिन्न कलाकारले प्रस्तुतिसमेत राख्नेछन् ।
प्रतियोगितामा प्रथम तथा द्वितीय हुने व्यक्ति वा समूहलाई नगद पुरस्कारसहित मेडल र प्रमाणपत्र पुरस्कार प्रदान गरिने छ ।
महोत्सव सञ्चालनका लागि करिब नौ लाख ५० हजार खर्च लाग्ने अनुमान गरिएको देवीस्थान सेवा समाजको कोषाध्यक्ष मोहन भण्डारीले जानकारी दिए ।
पोखरा २५ हेमजाका अध्यक्ष एवं पोखरा महानगर प्रवक्ता मोतीलाल तिम्सिनाले महोत्सव उद्घाटन गर्नेछन्।
झाँकी व्यवस्थापन संयोजक विष्णु थापाका अनुसार असार १५ गते बिहान ९ः३० बजे विष्णुपादुका माई स्थान मन्दिरबाट सुरु हुने झाँकी देवीस्थान मार्ग हुँदै मिलचोक परिक्रमा गरी महोत्सव स्थल पुग्नेछ ।
