पोखरा, साउन २७ – सिटिजन फर्निचर पोखराको आयोजनामा पाल्पाको रिब्दीकोट गाउँपालिका–३, श्री भीमसेन गुठी भैरवस्थान, हटियाद्वारा प्रस्तुत ऐतिहासिक पाल्पाली लाखे नाच सोमबार साँझ पोखरामा भव्य रूपमा भएको छ।
सांस्कृतिक आदानप्रदान र पर्यटन प्रवर्द्धनको उद्देश्यसहित न्यूरोडस्थित सिटिजन फर्निचरको मूल सडकमा साँझ ७:३० बजेदेखि मध्यरातसम्म भएको कार्यक्रममा ठूलो संख्यामा दर्शकहरू उपस्थित थिए।
कार्यक्रममा पाल्पाली समाज पोखरा र सिटिजन फर्निचरको सहकार्यमा भैरवस्थानको रोट, टिका–प्रसाद, बटुक र चुकाउनीजस्ता परम्परागत परिकारद्वारा पाहुनाको स्वागत गरिएको थियो।
जनविश्वासअनुसार, करिब ५०० वर्षअघि पाल्पाली राजा मणिमुकुन्द सेन प्रथमले काठमाडौं आक्रमणका क्रममा भैरव मूर्तिसहित केही नेवार समुदायलाई पाल्पा ल्याएपछि लाखे नाचको सुरुवात भएको हो। यस परम्परालाई श्री भैरवस्थान गुठीले निरन्तरता दिँदै आएको छ।
कार्यक्रमका संयोजक तथा सिटिजन फर्निचरका प्रोपाइटर दीपक कार्कीले पोखरामा देखिएको उत्साह र सहभागिताप्रति आभार व्यक्त गर्दै आगामी वर्ष पनि यस्ता कार्यक्रम निरन्तर सञ्चालन गर्ने प्रतिबद्धता जनाएका छन्।
