साउनको पहिलो हप्ताबाट सुरु भएको पहिरोले बन्द रहेको अरनिको राजमार्गमा अझै पनि निर्बाध रूपमा सवारी आवतजावत गर्न सकेका छैनन् । हिजो मात्रै सडक पुनः खोलिएको भनिए पनि यहाँका स्थानीय यो समस्याको स्थायी समाधानको खोजीमा छन् ।
“हिजो मात्रै पहिरो पन्छाइएको छ तर कति बेला पहिरो झर्छ भन्ने टुङ्गो छैन । पहिरो झर्ने र हटाउने भन्दा पनि पहिरो नै नआउने बनाउन पर्ने हो । गाडी चल्न सकेका छैनन् त्यसो हुँदा यहाँ आउने ग्राहक पनि घटेका छन् । हामी पनि आफ्नो सामान त्यही पहिरोबाट नै नाम्लो लगाएर बोकेर ल्याउने गरेका छौँ ।” एक स्थानीय व्यापारीले भने ।
पहिरोले बाटो बन्द हुँदा तातोपानी नाका भएर हुने आयात पनि प्रभावित भएको छ । दुई महिनादेखि नै कोदारी सडक बन्द हुँदा छिमेकी चीनबाट आयात गरिएका सामानहरू बाटोमै अड्किएका छन् । अझ चाड पर्वको लागि भनेर ल्याइएको फलफूलहरू कुहिइसकेका छन् भने जाडोको लागि भनेर आयात गरिएका केही सामाग्रीहरू चीन तर्फ नै अड्किएका छन् ।
सिन्धुपाल्चोकबाट तातोपानी नाका जाने यो राजमार्गको इकोमा मात्रै होइन, अविरल वर्षाले डाक्लाङ र मिनिट्रक पार्किङ क्षेत्रमा पनि पहिरोले सडक अवरुद्ध बनाउने गरेको छ । लिपिङबाट भरियाले बोकेर इको पहिरो कटाएका २१ कन्टेनर फलफूल डाक्लाङ पहिरोले रोकेपछि १२ दिनदेखि रोकिएका छन् ।
१५ कन्टेनर फलफूल मितेरीपुल कटेर लिपिङ क्षेत्रमा रोकिएको छ । पहिरोका कारण दुई महिनादेखि तातोपानी भन्सारको राजस्व सङ्कलनमा गम्भीर धक्का लागेको छ ।
