चिलीको नयाँ राष्ट्रपतिमा दक्षिणपन्थी जोसे एन्टोनियो कास्टको ठूलो जित

चिलीको दक्षिणपन्थी रिपब्लिकन पार्टीका उम्मेदवार जोसे एन्टोनियो कास्ट राष्ट्रपति निर्वाचनको दोस्रो चरण (रनअफ) मा ठूलो मतान्तरले जित हासिल गर्दै चिलीको नयाँ राष्ट्रपति निर्वाचित हुनुभएको छ । घोषित परिणामअनुसार कास्टले ५८.१८ प्रतिशत मत प्राप्त गर्नुभएको छ । सत्तारुढ वामपन्थी गठबन्धनकी उम्मेदवार जेनेट जाराले ४१.८२ प्रतिशत मत मात्र पाउनुभयो । चिलीको निर्वाचन सेवाकाअनुसार ९९.३३ प्रतिशत मत गणना हुँदा कास्टको जित स्पष्ट भएको हो । जाराले सामाजिक सञ्जालमार्फत पराजय स्वीकार गर्दै कास्टलाई बधाई दिनुभएको छ । वर्तमान राष्ट्रपति गाब्रियल बोरिकले पनि कास्टलाई जितको बधाई दिनुभयो । ५९ वर्षीय कास्ट मार्च ११, २०२६ मा पदबहाली गर्नुहुनेछ । चुनावी अभियानमा उहाँले सार्वजनिक सुरक्षा र आपराधिक समूहहरूमाथि कडा कारबाही गर्ने नीतिलाई जोड दिनुभयो । उहाँले उच्च सुरक्षा कारागार निर्माण गर्ने र अपराधीहरूलाई कडा सजाय दिने प्रतिवद्धता गर्नुभयो ।