पोखरा महानगरपालिका वडा नं. ७ का स्थानीय जेन्जी युवाहरूले उम्मेदवार रश्मि आचार्यलाई मतदान नै गरेर नेकपा (एमाले) पोखरा–७ को निर्वाचन कार्यालय शुभारम्भ गरेका छन् । पोखराको बिकासमा ” लिङ्क पोखरा ” योजना बनाउन ध्यान दिने – एमाले कास्की दुइका उम्मेदवार रश्मि आचार्य ।
उनीहरूले जेन्जी पुस्ताको भावना र आशाअनुसारको भरोसा र योजना सहितको आफ्नाे रोजाइको उम्मेदवार पाएकोमा खुशी व्यक्त गर्दै मतदान नै गरेर सो वडाको निर्वाचन अभियान शुभारम्भ भएको घोषणा गरेका हुन् ।
स्थानीय सुकर्ण पौडेल, सुक्रान्त पौडेल, परिवेश रेग्मी सहित दर्जनौँको संख्यामा कार्यक्रममा पुगेका युवाहरूले विगतका योजना र कामको मूल्यांकन गर्दै अपुरा काम पूरा गर्ने, नयाँ नीति निर्माण गर्ने र पुराना अव्यवस्थित नीतिहरूलाई व्यवस्थित बनाउने विषयमा उम्मेदवार आचार्यलाई सुझावसमेत दिएका छन् ।
सो अवसरमा देशको नयाँ पुस्ताको चाहना बुझेको, युगको माग सम्बोधन गर्न सक्ने क्षमता रश्मि आचार्यमै रहेको भन्दै सबै युवाहरू आचार्यलाई विजयी गराउन प्रतिबद्धताका साथ लाग्ने उल्लेख गरे ।
कार्यक्रममा नेकपा (एमाले) कास्की क्षेत्र नं. २ का प्रतिनिधि सभाका उम्मेदवार रश्मि आचार्यले पोखराको सहरी इलाका र ग्रामीण क्षेत्रबीच घनिष्ठ सम्बन्ध निर्माण गरी पर्यटन विकासका लागि आफूले ‘लिङ्क पोखरा’ अभियानको परिकल्पना गरेको बताउनुभयो ।
‘लिङ्क पोखरा’ मास्टर प्लान हुनेछ । पोखराको ग्रामीण इलाका र शहरी इलाकाबीच स्थानीय तथा पर्यटकहरूको आवतजावत घनिभूत बनाउन यो योजना महत्वपूर्ण हुने उहाँले बताउनुभयो । साथै संघ, प्रदेश र स्थानीय तहसँगको सहकार्यमा पर्यटकको बसाइ अवधि लम्ब्याउन सकिने उहाँको भनाइ थियो ।
पर्यटनको राजधानी पोखरालाई अझ धेरै पर्यटक आउने शहर बनाउनेतर्फ आफू केन्द्रित हुने बताउँदै उम्मेदवार आचार्यले पोखराको समृद्धिमा यो योजना महत्वपूर्ण हुने उल्लेख गर्नुभयो ।
मर्यादित र व्यवहारिक शिक्षा अबको कार्यनीति हुने उल्लेख गर्दै युवालक्षित रोजगारीको वातावरण निर्माण गर्ने नीति निर्माणमा जोड दिने उहाँले बताउनुभयो ।
कार्यक्रममा एमालेका पूर्व पोलिटब्यूरो सदस्य सीता गिरी ओलीले जनताको रोजाइको उम्मेदवार, आन्दोलन, शिक्षा, बौद्धिकता र इमान्दारिताका हिसाबले योग्य उम्मेदवार रश्मि आचार्य नै कास्की क्षेत्र नं. २ का जनताको रोजाइ हुने उल्लेख गर्नुभयो । युवाहरूको तीव्र र व्यवस्थित विकासका एजेण्डा कार्यान्वयन गर्न रश्मि आचार्य अब्बल उम्मेदवार भएको उहाँको भनाइ थियो ।
एमाले पोखरा–७ का अध्यक्ष अनिल शाहीको अध्यक्षतामा सम्पन्न कार्यक्रममा स्वागत मन्तव्य दीपकजंग कार्कीले राख्नुभएको थियो भने सञ्चालन सचिव अर्जुन थापाले गर्नुभएको थियो ।
