पोखरा । पोखराको विजयपुर खोलामा बगेर बेपत्ता भएका दुई बालकको खोजी कार्य जारी छ । सशस्त्र प्रहरी बलले गोताखोर तथा रोप रेस्क्यू विशेषज्ञसहितको टोली परिचालन गरी सम्भावित क्षेत्रमा खोजीलाई तीव्र बनाएको छ ।
शनिबार दिउँसो करिब १:२० बजे पोखरा १४ चाउथे भोटेचौताराबाट ह्याप्पील्याण्डतर्फ जाने क्रममा विजयपुर खोला तर्दै गर्दा दुई बालकलाई खोलाले बगाएको थियो । बेपत्ता हुनेमा पोखरा १४ छिनेडाँडा निवासी १४ वर्षीय निक्सन गुरुङ र खोटाङ घर भई हाल पोखरा १४ चाउथे बस्दै आएका १५ वर्षीय ओमन राई रहेका छन् ।
घटनाबारे जिल्ला प्रहरी कार्यालय कास्कीबाट जानकारी प्राप्त भएपछि सशस्त्र प्रहरीको विपद् व्यवस्थापन टोली तत्काल परिचालन गरिएको थियो । सशस्त्र प्रहरी बल नेपाल औद्योगिक सुरक्षा बेस कुँडहरबाट सशस्त्र प्रहरी निरीक्षक केशव शर्माको कमाण्डमा गोताखोरसहित ९ जनाको टोली घटनास्थल पुगेको थियो ।
शनिबार दिउँसो २:१५ बजेबाट सुरु गरिएको खोजीका क्रममा टोलीले घटनास्थलदेखि करिब दुई किलोमिटर तलसम्म खोला किनार तथा अन्य सम्भावित स्थानमा खोजी गरेको थियो । साँझ ६:४० बजेसम्म पनि बेपत्ता बालक फेला नपरेपछि उक्त दिनको खोजी कार्य स्थगित गरिएको थियो ।
आइतबार बिहान ९ बजेदेखि थप जनशक्ति र उद्धार सामग्रीसहित पुनः खोजी सुरु गरिएको छ । सशस्त्र प्रहरी बल नेपाल नम्बर २४ गण हेडक्वाटर कालिका, कास्कीबाट सशस्त्र प्रहरी निरीक्षक साजन श्रेष्ठको नेतृत्वमा ११ जनाको टोली परिचालन गरिएको छ ।
गोताखोर तथा रोप रेस्क्यू विशेषज्ञसमेत सहभागी टोलीले बिहान ९:३० बजेदेखि विजयपुर खोला आसपासका सम्भावित क्षेत्रमा खोजी तथा उद्धार कार्यलाई निरन्तरता दिइरहेको छ ।
