देउराली यूवा क्लबको दशौं भलिबल प्रतियोगिता

पोखरा ।
देउराली युवा क्लब शहिद लखन ५ देउरालीछाप गोरखाले १० औं देउराली कप भलिबल प्रतियोगिता आयोजना गरेको छ । माघ २ गतेदेखि मकर संक्रान्तिको अवसरमा देउराली समीचौतारा खेल मैदानमा उद्घाटन हुने क्लबका सचिव रितबहादुर थापाले जनाएका छन् ।
माघ १ गतेसम्म ३ हजार ९ सय ९९ रुपैया ँतिरेर टिम दर्ता गर्ने अवसर रहेको कार्यक्रम संयोजक सानुबाबु आलेले जानकारी दिएका छन् । ९ जना खेलाडी संख्या रहने टिमले प्रथम पुरस्कार ६० हजार, ट्रफी, मेडल र प्रमाणपत्र प्राप्त गर्नेछन् । खेलमा द्वितीय हुनेले ४० हजार, तृतीय हुनेले २५ हजार नगद प्राप्त गर्नेछन् ।
क्लबले विधागत पुरस्कारको व्यवस्था गरेको छ । सर्वोकृष्ट खेलाडीले २ हजार, उत्कृष्ट इस्पाइकरले १ हजार, उत्कृष्ट लिब्रोले १ हजार, उत्कृष्ट ब्लकरले १ हजार, उदयमान सेटरले १ हजार र उदयमान खेलाडीले १ हजार नगद प्राप्त गर्ने क्लबका अध्यक्ष खड्कबहादुर थापाले जानकारी दिएका छन् । खुल्ला पुरुष भलिबल प्रतियोगिता २०८१ ले खेल जगतलाई मर्यादित र अनुशासित बनाउने मुख्य लक्ष्य रहेको अध्यक्ष थापाले जनाएका छन् ।